Duha ka mga kapitan mipasalig nga walay kagubot mahitabo

CEBU, Philippines - Magkaatbang sa pagkakapitan sa Barangay Punta Engaño dakbayan sa Lapu-Lapu mipasalig nga mosubay sila sa balaod ug dili motisok og kagubot ang ilang mga tigpaluyo.

Si Lourdes Ibag ug si Josie Hayashi  parehong miawhag sa ilang mga tigpaluyo nga sundon ang legal nga proseso ug dili motisok og kagubot sa ilang barangay. Si Ibag gikatakda pang moapelar ngadto sa Commission on Elections (COMELEC) ug mosang-at pa og tubag nga gipangayo sa korte sud sa lima ka adlaw nga gihatag ni MTCC Judge Francisco Garciano.

Matud pa ni Ibag kung duna nay final nga kamanduan gikan sa Department of Interior and Local Government (DILG) andam siya nga mosunod sa maong kamanduan diin ang importante alang kaniya mao nga limpiyo ang iyang konsensiya nga wala siya manikas sa milabay’ng piniliay sa barangay.

Samtang si Hayashi kinsa gipaboran sa korte nga mao gyuy midaug sa milabay’ng piniliay igo na alang kaniya nga nahatagan og katin-awan ang iyang pagduda nga siya nabiktima sa pagpanikas sa maong bugnong lugaynon. (BANAT NEWS)