Sugat ug mga resorts gidugokan sa mga tawo
CEBU, Philippines - Nagdasok ang mga tawo sa nagkadaiyang simbahan sa Sugbo atol sa presentasyon sa tagsa-tagsa nila ka mga Sugat, ug ang labing popular niini mao ang Sugat sa Kabanhawan sa Minglanilla.
Kagahapon, gibanabanang 20 mil ka tawo ang mitambong sa sports complex sa Minglanilla atol sa presentasyon sumala pa ni Sr. Insp. Richard Gadingan. Mas daghan kini sa mitambong sa milabay’ng tuig.
Apan nabalda kini og makadiyot dihang duha ka mga lalaki ang gitabangan og kulata sa mga tawo kay gipasanginlang kawatan nga mao sila si Bobby Alcanzado, 32, taga Bao, Naga City, ug ang 27- anyos nga si Al Tantay nga taga Tabunoc, Talisay City. Ang duha kusganong mihimakak sa pasangil.
Lima ka mga nanan-aw ang nagpa-blotter nga nawad-an sila sa ilang mga cellphone, matud pang Gadingan posibleng dunay mga kauban ang duha nga maoy nagdala sa mga nakawat nilang mga butang.
Samtang sa National Shrine of Our Lady of Guadalupe, liboan usab ka tawo ang mitambong sa ilang “Sugat.â€
Si Cebu Archbishop Jose Palma miingon atol sa Easter Vigil nga si Hesu- kristo miabot sa yuta aron wagtangon ang kangitngit. Gidasig ni Palma ang katawhan nga sundon ang mga tunob ni Hesus ug angay nga maglipay sa kabanhawan.
Sa laing bahin, nahimo nang tulumanon sa mga banay human sa sugat ang pagpangaligo sa dagat sa mga mahalon o bisan kadtong baratuhon o ba kaha libreng resorts.
Usa sa labing gidugok og maayo ang South Road Properties sa Cebu City, dunay de-sakyanan ug duna say de-karomata.
Malinawon usab ang pagsaulog sa Easter Sunday sa ikaunom nga distrito sa lalawigan sa Sugbo nga gilangkoban sa dakbayan sa Mandaue, lungsod sa Consolacion ug lungsod sa Cordova. – Bryner Diaz, Brenda Batuto, Romeo Limpangog ug nila ni Juffer Deen Bornales ug Lara Praz Mayol,CNU Interns/EIM (BANAT NEWS)
- Latest
