Pagtulis sa LBC-Moalboal nakuhaa’g video

CEBU, Philippines - Ipa-enhance sa kapolisan ang CCTV footage sa LBC Moalboal branch aron mailhan ang duha ka lalaki nga responsable sa pagtulis sa maong branch pasado ala una sa hapon sa miaging adlaw.

Si PO3 Edwin Ellut, desk officer, nga nahinabi sa Banat News miingon nga nagtinguha ang imbestigador sa maong kaso nga si SPO3 Beriarte tungod kay hanap ang kuha sa CCTV.

 Matud pa ni Ellut nga ang maong pagpanulis gihimo sulod sa kwatro minutos.  Unang misulod ang usa ka lalaki nga nagsul-ob og puti nga t-shirt, maong nga karsones, nagkalo, sakto ra’ng gidak-on sa lawas ug may gitas-on nga 5’8’’ ug mideklarar nga “tulis ni.”

 Gitionan og armas sa maong lalaki si Danilo Sultan, taga Knasantic, Sibongan delivery man, ug gipukpok ang ilang ulo ug gisugo nga pahapaon sa salog.

Human niini misulod ang usa ka lalaki nga nagsul-ob og polo shirt, maong nga karsones, nagpangedaron na og 50-55 anyos, may dala nga knapsack bag, ug may gitas-on nga 5’4.”

Sunod nga gitionan og armas mao si Esmeraldo Sambarano, 27, taga Bugho, Moalboal, teller, giguyod kini sa lalaki nga nagdala og armas padulong sa vault ug gimandoan sa pag-abli niini.

Apan kay wala man kahibalo ang maong teller gipriso kini kuyog si Sultan sulod sa kasilyas. Gikuha dayon sa mga tulisan ang kwarta nga naa sa drawer sa maong LBC Branch ug misibat sakay sa usa ka Toyota Innova ug mipasirit ngadto sa Alcantara.

Matud pa ni Ellut nga daling giradyohan sa ilang estasyonan ang kapolisan sa mga duol nga lungsod apan pakyas sila sa pag-intercept sa maong sakyanan.

Naglaom ang kapolisan nga makuha nila ang plaka sa maong sakyanan. (BANAT NEWS)