Tulisang paboritong biktima taga MEPZ nadakpan sa LCPO

CEBU, Philippines -  Naaktuhan na gyud sa kapolisan ang usa ka notadong tulisan nga kanunay mamiktima sa mga empleyado sa Mactan Export Processing Zone (MEPZ) diha sa Pusok, Lapu-Lapu City kagahapon sa buntag. Ang nasikop mao si Randy Mabuti Legaspe, 35, residente sa Gen. Maxilom Avenue sa dakbayan sa Sugbo. Matud pa ni Sr. Insp. Junil Caadlawon ang hepe sa Station 5 sa kapolisan sa Lapu-Lapu dugay na nilang gihup-an si Legaspe gumikan sa kanunay nga alarma sa pagpanulis sa maong dapit.

Kagahapon sa kaadlawon samtang gikan sa trabaho si May Nabasca, 22, residente sa sitio Cemento, Pusok sa dakbayan sa Lapu-Lapu ug usa ka empleyado sa MEPZ padung na unta mopauli gisundan kini sa suspek ug gitionan og kutsilyo dayong deklarar nga tulis. Apan misinggit si Nabasca hinungdan nga gitabangan kini og gukod sa mga tawo hangtud nga nadakpan.

Nakuha gikan ni Legaspe ang daghang ATM cards sa nagkalainlaing pangan nga posibleng iya sa mga biktima, kutsilyo, cutter ug gunting. Nasayran sa kapolisan nga daghang kaso sa pagpanulis sa taxi, PUJ ug traysikol sa dakbayan maong giawhag ni Caadlawon ang mga biktima sa pagpakita sa ilang buhatan aron masusi kung si Legaspe ba ang mibiktima kanila. (BANAT NEWS)