Dugang atraksyon gibutang sa museum sa Carcar City

CEBU, Philippines - Gibuksan sa kagamhanan sa dakbayan sa Carcar ang usa ka dugang atraksyon sa ilang museum nga maghatag og pagtagad sa natad sa musika gikan sa mga Carcaranon.

Si Carcar City Mayor Nicepuro Apura nagkanayon nga ang pagbutang og lawak alang sa mga Carcaranong mag-aawit ug kompositor gikan sa pamilyang  Abellana usa karon sa bag-ong atraksyon sa museum.

Ang mga obra nga kinulit ug gipintal nila ni Martino, Ramon ug Sindulfo Alcoseba-Abellana gihatagan og espesyal nga lawak diha sa maong museum. Ang maong kalihukan kagahapon giatol kini sa birthday ni Apura.           

"We are very grateful and honor that the city government honor and showcasing my uncles and father works. This testimony shows rich heritage and I hope that this exhibit will serve its purpose," matud ni Gabby Abellana, anak ni Ramon. Si Martino kinsa naila nga "Noy Tinong," usa ka Cebuano painter samtang si Ramon naila isip music composer. Si Sindulfo, nailhan sa iyang pagka-sculptor ug lakip sa iyang mga inilang gikulit mao ang estatuwa ni San Mateo ug San Pedro nga anaa diha sa St. Catherine de Alexandria Church sa Carcar, ang bunyagan nga lugar diha sulod sa simbahan ug ang  Official Seal sa Carcar. Lakip sa makita sa museum ang mga karaang butang sama sa kubiyertos, plantsa, mga plato, mga musical instrument ug uban pang mga karaang butang nga maoy gigamit kaniadto, ingon man ang karaang kopya sa The Freeman.  (BANAT NEWS)