Kawani sa gobiyerno gidid-an pagdawat og regalo

CEBU, Philippines - Higpit nga gipasidan-an  ni Commission on Elections (COMELEC) Chairman Sixto Brillantes, Jr.  ang  iyang mga opisyal ug kawani  batok sa pag-solicit o pagdawat og bisan unsang regalo  niining  panahon sa Pasko.

Sumala  sa taho  sa PIA  nga  mahimong pamultahon  ni  Brillantes o mapalagpot  sa serbisyo ang mga kawani nga modawat o mangayo og bisan unsang regalo, ma-cash man o mabutang. Gipasabot ni Brillantes,  nga ang bisan unsang regalo maisip  nga suhol, ilabi na kun gikan pa  kini  sa usa  ka tawo nga adunay nag-ungot nga kaso sa   Comelec.

Hinuon sa mga mamugos gayud nga mohatag og regalo sama sa pagkaon, mahimong may exemption  tungod kay mahatag man kini sa uban.

Sa samang  higayon  gimando  usab ni Brillantes nga istrikto nilang gipatuman ang mga gidili  base sa  Republic Act 6713 o ang “Code of Conduct and Ethical Standards for Public Officials and Employees,” nga naglatid nga ang bisan kinsang opisyal ug kawani sa gobyerno dili angay  mangayo  o modawat og bisan unsang regalo, gratuity, pabor, entertainment, loan o bisan unsang adunay  bugti  nga  kantidad , direkta man o         indirekta.

Midugang ang PIA paghisgot  nga  ang molapas niini mahimong pahamtangan og multa nga dili molapas sa unom ka buwan  nga  walay  sweldo  o suspensiyon nga dili molapas sa usa  ka tuig, o pagkatangtang sa serbisyo, depende sa gibug-aton sa salang nahimo.

Matud  pa  sa  PIA  nga kasamtangang gihikay   na  karon  sa  COMELEC sa pagpaminaw   sa mga  kaso  sa protesta  sa election  gikan sa  dili  pa  dugay nga  piniliay sa nasud.  (BANAT NEWS)