Hunta sa Sugbu miduyog sa panawagan nga Bar Exams anhi himuon sa Kabisay-an

CEBU, Philippines - Niduyog na ang Hunta Probinsiyal sa Sugbo sa panawagan ngadto sa Korte Suprema nga mapahigayon  ang eksaminasyon sa Bar sa abogasiya gawas sa Metro Manila. Usa ka resolusyon nga gipangamahan ni Bokal Peter John Calderon kinsa usa usab ka abogado nga nagpadayag sa maong hangyo ngadto sa Korte Suprema. Ang Bar Examination ipahigayun ka usa matag tuig sa Manila.

Gipasabot ni Calderon nga ang nanguha og abogasiya sa probinsiya adunay tagsatagsa ka trabaho ug pamilyado sa ilang lugar.

Kinahanglan pa nga mobiya sa trabaho ug mopuyo sa Manila og pipila ka buwan sa dili pa ipahigayun ang eksaminasyon.

Matud pa ni Calderon nga alkansi ang mga probinsiyano nga mokuha sa eksaminasyon ug makagasto pa og daku samtang atoa sa Manila.

Kini ang hinungdan nga ang uban dili makapangandam pag-ayo ilabi na kung dunay problema ang ilang pamilya nga layo kanila.

Dugang pa ni Calderon nga ang ka moderno na sa teknolohiya ang masaligan nga pabiling ligdong ang eksaminasyon sama sa gihimo sa Professional Regulations Commission nga nagpahigayun og mga eksaminasyon sa probinsiya.

(BANAT NEWS)