Tungod sa iro, usa patay, duha angol sa motor
CEBU, Philippines - Patay ang usa ka amahan samtang angol ang anak ug asawa niini nga kagawad sa barangay human sila nangatumba gikan sa gisakyang motorsiklo dihang nakaligis sila og iro nga kalit lang milabang sa dalan diha sa barangay Malhiao sa lungsod sa Badian sa alas 9:00 sa miaging buntag.
Ang namatay naila nga si Isabelo Ricardo, 51, samtang angol usab ang iyang asawa nga si Cerdenia barangay kagawad Bernardita Ricardo, 50, sa lungsod sa Malabuyoc. Naangol sab ang anak sa magtiayon nga si Ken Ian Ricardo, 19.
Matud pa sa saksi nga si Rommel Ambil, organist sa St. James the Apostle Parish Church sa Badian nga ang mga biktima padulong sa lungsod sa Moalboal gikan sa Malabuyoc.
Apan pag-abot sa nahitaboan, dunay usa ka iro nga kalit lang milabang ug naligsan ni Ricardo apan natumba silang tulo hinungdan sa kadaot nga ilang naangkon.
Ang mga biktima daling gidala sa mga estambay sa Badian District Hospital apan gibalhin ra pud kini dayon sa Velez General Hospital.
Matud pa ni PO1 Johannes William Cordova nga nahinabi sa Banat News nga usa ka Salvacion Endrina, empleyado sa Moalboal Municiapl Hall ang mitaho sa Badian Police nga namatay si Isabelo. (BANAT NEWS)
- Latest
