Nob. 1 malinawon, apan mga pasaheroan nagnihit

CEBU, Philippines - Malinawon ang pagsaulog sa kalag-kalag karong tuiga sumala pa sa tigpamaba sa Police Regional Office 7 Supt. Renato Dugan base sa assessment sa Regional Director nga si Chief Supt. Danilo Constantino nga milibot sa lalawigan sa Sugbo kagahapong adlawa.

Si Supt. Dugan nga nahinabi sa Banat News miingon nga sa ilang pagsusi sa kahimtang sa sam-ang sa lalawigan dunay mga nabantayan si Constantino nga wala siya makauyon ug gimando niya dayong usbon.

Gimando ni Constantino nga dugangan ang presensya sa polis sulod sa sam-ang ug dili lang magtapok sa ganghaan sa sementeryo.

Samtang ang Police Assistance Center sa sam-ang sa dakbayan sa Naga gipabalhin usab sa sulod nga bahin sa maong sam-ang tungod kay nakita ni Constantino nga layo ra kaayo kini kay malangay sila og responde kung dunay mahitabo sa sud.

Samtang sa sam-ang sa Calamba gipahugtan og maayo ang seguridad sa maong lugar ug gisusi ang matag bags sa mga tawo nga misulod sa sam-ang ug 15 ka mga bladed weapons  kagahapon sa udto lakip na sa mga kutsilyo ug mga gunting ang nasakmit.

Samtang sa Carreta cemetery gipahugtan sab ang ilang seguridad ug gipatuman ang pagrekisa sa mga bag sa mga tawo nga mosulod sa maong sam-ang. Sa sayong kahaponon nakompiskar sa kapolisan ang duha ka botelya sa bino, lakip na sa mga scrapers, paleta, upat ka kutsilyo, usa ka cutter, tulo ka toy gun ug unom ka blades.

Usa ka lalaki nga menor ang gisignit sa mga anticrime volunteer tungod kay naaktohan kini nga nanguha og  kandila nga gidagkot bisan taas pa.

Samtang sa pantalan ug terminal, nagnihit ang mga bus pasaheroan nga kasakyan kagahapon diha sa North Bus Terminal ug sa South Bus Terminal tungod sa kadaghan sa mga pasaherong buot makauli sa ilang mga probinsya.

Susamang talan-awon usab ang nasaksihan sa Banat News sa pier area diin ang mga pasahero naglumbay sa taas kaayong linya hangtud sa gawas sa pantalan aron lang makapalit og ticket alang sa alas-7 ug alas-8 nga biyahe padung sa Bohol, Samar ug Negros ingon man sa Mindanao. (BANAT NEWS)