Trumpa gigamit pagpahibawo nga luwas kan-on

CEBU, Philippines - Migamit na og  trumpa ang mga naninda og isda sa dakbayan sa Lapulapu ug Mandaue gumikan sa kagamay sa ilang kinitaan sukad malunod ang barko sa dakbayan sa Talisay nga  maoy  hinungdan   sa oil spill.

Naabtan sa Banat News ang usa ka kawani sa merkado (dili magpaila) nga migamit og mega phone ug mituyok sa palibot sa merkado publiko sa dakbayan sa Lapulapu ug mipasabot  sa mga parokyano nga luwas ang mga isda nga ilang   gibaligya.

Susamang kalihukan ang gihimo sa mga tindero og isda sa dakbayan sa Mandaue sa ilang pagdani sa katawhan   nga suportahan ang  mga  lab-asira.

Gipasabot sa mga tigpamaba sa duha ka merkado nga kasagaran sa mga isda nga  ilang gibaligya gikan  sa lagyong lugar sama sa Bohol, Bantayan, isla sa Mindanao  ug uban  pang  lugar nga luwas   nga  kaonon  ug dili  kontaminado.

Magpadayon ang paggamit  og  trumpa sa mga kamerkadohan  sa pagpasabot sa katawhan nga dili makadaut sa lawas ang mga isda nga ilang gibaligya.

Miminus ang kinitaan sa mga naninda og isda sa kamerkadohan gumikan sa nalunod nga barko sa dakbayan sa Talisay   sa ilang  pagtuo  nga  ang  mga  nangamatay  gikitkit  sa  mga isda. (/WC) (BANAT NEWS)