Mga babayeng biktima sa eksploytasyon sa usa ka massage parlor nasalbar

CEBU, Philippines - Walo ka babayeng masahista apan giingong motanyag usab og “extra service” nga pakighilawas ang nasalbar sa mga sakop sa Investigation and Detective Management Branch (IDMB) ug taga Department of Social Welfare and Services (DSWS) pasado alas-10 sa miaging gabii diha sa usa ka massage parlor sa may Gorordo Avenue ning dakbayan.

Ang mga babayeng na-rescue nagpangidaron og 25-anyos ngadto na sa 30-anyos  nga nagtrabaho diha sa Heart Health Massage Parlor nga gikatahong gidumala sa usa ka Ritchie Sanchez. Ang hepe sa kapolisan sa IDMB Chief Insp. Aileen Recla mipadayag nga ang taga DSWS nga gipanguluhan ni Dr. Ester Concha nakig-alayon kanila human usab makadawat og impormasyon kalabot sa extra service nga gitanyag sa mga babayeng masahista.

Nakompirmar kini dihang usa sa ilang mga police decoys ang gitanyagan sa mga babaye og P250 nga masahe ug P500 ang “extra service (sex).”

Dihang nagpositibo diritsong gironda sa kapolisan uban sa mga kawani sa DSWS ug didto ilang na-rescue ang walo ka mga babaye. Padayag pa ni Recla nga dili lang kay walo ka mga babaye ang nagtrabaho sa maong massage parlor tungod kay duna pay ubang babayeng giingong ‘gi-outing’ na sa mga kustomer. Si Dr. Ester Concha mipadayag nga pwerteng hugawa, huot ug peligro sa sunog ang maong establisamento tungod kay way fire exit. Nasuta usab nga expire na ang business permit niini. Ang tag-iya sa maong building nga si Francisco Peralta, mipadayag usab nga wala siya masayod nga aduna diay susamang mga kalihukan ang maong dapit tungod kay igo ra man nga giabangan ang iyang establisamento.

Usa sa mga na-rescue, nga si Laila (dili tinuod nga ngalan) mipadayag nga magdependi lamang sa mga babaye kung mosugot sila og extra service, apan giangkon niyang kasagaran di gyud makabalibad tungod sa panginahanglan. (/EIM) (BANAT NEWS)