Kasong administratiba atubangon ni Aton

CEBU, Philippines - Posibling mag-atubang og kasong administratiba ang police   kansang  service firearm   gidala  sa amigo  niini nga  namusil  sa  waiter  sa usa  ka  imnanan  sa Osmeña Boulevard,  barangay  San Antonio ning  dakbayan  sa Sugbo  sa miaging  Sabado  sa gabii.

Sa pakighinabi sa Banat News ni Chief Supt. Danilo Constantino, ang hepe sa kapolisan sa Central Visayas mipadayag  nga kasamtangang  gipaubos sa imbestigasyon si PO1 Adrian Aton  sa ilang  headquarter.

Matud pa ni Constantino nga ilang gisuta   nganong  nahiabot sa mga kamot  ni Rampi Cabañero  ang .45 kalibre  nga service  firearm  ni Aton.

Miingon  si  Constantino  nga  usa  ka dakong  kalapasan  sa balaod  ang  nahimo  ni  Aton  tungod  kay day off  niya  busa  di  siya angay  mosuroy  nga  magdala  sa iyang armas  de feugo  sa maong  higayon.

Dugang pa ni Constantino nga ila usab nga sutaon ug kun aduna bay negligence nga nahimo si Aton kalabot sa maong insidenti.

Apan gipasabot usab ni Constantino nga adunay posibilidad usab nga dili ra mahilambigit si Aton sa maong insidenti.

Sa pagkakaron padayon pang gipangita sa kapolisan si Cabañero  human  kini  molayas  nga dala  ang  armas  ni  Aton.

Nasayran  nga  gideposito niadtong higayona sa counter sa bar  nga  ilang  gisudlan  ang  armas  ni  Aton  una  sila  molingkod  aron mag-inom.

Apan  giingong  walay  kalibotan  si Aton  nga  gikuha  ni Cabañero  ang  iyang  armas  dayon  giluthang  niini si Raymund Bayarcal, 26,  ang waiter  sa maong imnanan.

Si  Bayarcal  gipasanginlan  nga  may  labot  sa pagkatangtang  ni  Cabanero  isip  sikyu  sa maong  bar  hinungdan  nga  nagdumot  siya  niini.

Usa  sa  hinungdan  nga  gitangtang  sa management  sa bar  si  Cabanero  mao  ang  giingon  nga  nagpasulod  kini  og  tawo  sa bar  nga  libre  ang  entrance fee.( /WC)  (BANAT NEWS)