Motibo sa pagpusil sa pamilyang Medina gisuta

CEBU, Philippines - Dako ang pagtuo  ni Chief Supt. Marcelo Garbo, Regional Director  sa kapolisan  sa Central Visayas    nga aduna pay mas lalom  nga estoryang ilang angayan nga subayon  aron pagsuta sa motibo  sa  pagbanhig  ug  pagpamusil  sa pamilyang  Medina dinhi  sa Sugbo.

Kini bisan sa ilang   pasiunang mga  pag-analisar  sa maong insidenti   nga  igo  lang    kidnapon  ang magtiayon  nga sila si  Dr. Rico ug Arlene Medina.

Miingon  si Garbo  nga  gituohan nila  nga   nalantawan  sa  mga  kidnaper  nga  makakuwarta  sila  kun  ilang  madagit  ang  kuwartahan  nga  pamilya.

Dugang pa ni Garbo nga aduna usa’y  dakong posibilidad nga ang pagkalambigit ni Dr.  Medina sa giingong Aman Futures ang dakong hinungdan.

Ingon  usab  niini  ang  napanglantawan  sa hepe sa City Intelligence Branch  nga  si  Chief. Insp. Romeo Santander nga adunay taas nga porsento   sa  posibilidad nga ang kalambigitan ni Medina sa Aman Futures maoy usa sa hinungdan sa pagpamusil.

Giangkon usab ni Santander nga susama sa naglisud pa sila karon sa paglihok tungod usab kay wala pa man mipatim-aw sa ilang buhatan ang pamilyang Medina.

Gusto  nilang  personal  nga  moreport  sa ilang  buhatan  ang  mga  biktima, aron usab unta positibong ilhon ang mga nakuhang impormasyon sa kapolisan.

Sa pagkakaron, aduna pa silay gihimong background check sa tawong ilang nailhan isip usa sa mga responsabli.

Kahinumdoman nga niadtong Domingo sa tungang gabii, gitabangan sa mga tawong  sakay  sa duha ka sakyanan sa  pagpamusil ang Fortuner nga gipanag-iya sa magtiayong Medina.

Nabulit kini sa mga bala sa kalibre .45 apan maayo na lang kay luwas ra  ang  mga  sakay  nga  mao  ang  magtiayong  Medina, ang  ilang anak  ug  usa  ka security guard. (BANAT NEWS)