Jailguards sa Cebu City Jail hatagan pagbalik sa ilang allowance sa CH

CEBU, Philippines - Si Mayor Michael Rama mipahibalo nga sugod sa sunod buwan sa Hulyo iya na nga hatagan pagbalik og tag P2,000 nga binuwan nga incentive ang matag usa sa mga gwardya sa Cebu City Jail.

Si Cebu City jail warden Johnson Calub ug ang iyang 131 ka sakop nahinangop kaayo sa pagkasayod sa gipahibalo sa mayor atol sa press conference kagahapon.

Matud ni Calub nga ang mga jail officers nga nadestino sa Cebu City Jail dili gyud hinoon makapasalig nga mapugngan nila ang tanang mga binuang diha sa prisohan.

Ang mayor miingon nga giaprobahan niya ang rekomendasyon sa Police Coordinating and Advisory Council (PCAC) nga hatagan pagbalik og incentives ang mga jail guards.

Giputol sa City Hall ang paghatag og incentive ngadto sa mga gwardya sa bilanggoan atul sa termino kaniadto ni kanhi mayor Tomas Osmeña kay ang mga opisyal sa Bureau of Jail Management and Penology (BJMP) nagdumili pag-abag sa imbestigasyon sa City Hall. Ang imbestigasyon gitumong aron unta mahibaw-an kun tinuod ba nga adunay ubang salapi nga gitagana alang sa pagkaon sa mga piniriso gibulsa ra sa mga mapahimuslanong opisyal sa BJMP.

Matud ni Rama nga karon nga gihatag na pagbalik sa City Hall ang allowance ang mga jail guards angay’ng maninguha gyud  nga maputol na ang mga binuang diha sa bilanggoan . (/EIM) (BANAT NEWS)