Trapiko gihan-ay na sa adlaw sa Kadaugan

CEBU, Philippines - Nahingpit na sa buhatan sa trapiko sa kagamhanan sa dakbayan sa Lapulapu ang paghan-ay sa dagan sa mga sakyanan atol sa duha ka adlaw nga kalihokan sa kasaulogan sa Kadaugan sa Mactan nga gikatakda   karong Abril 26 ug 27 niining tuiga.

Si Frank Brazil nga maoy pangulo sa City Traffic and Management System (CTMS) nga nahinabi sa Banat News kagahapon miingon nga sa Abril 27 sa buntag  atol  sa pagpahigayon sa reenactment sa  Kadaugan sa Mactan higpit nilang   bantayan ang mga dalan  paingon sa barangay Mactan.

Matud pa niya nga daghan ang mga tawo nga mosaksi sa reenactment sa panag-engkuwentro nila ni Ferdinand Magellan ug Lapulapu ilabi na gayod nga mga aktor sa pelikula ang modala sa  ngalan  ni  Lapulapu  ug  Magellan.

Gipaniguro hinuon ni Brazil nga sa maong  reenactment  nga  ipahigayon  sa baybayon  sa Mactan, dili  kaayo problema  ang  dagan  sa trapiko sa maong  dapit.

Dugang pa ni Brazil nga sa Abril 26 sirhan ang pikas lane  sa dalan M.L. Quezon ug ilang himoong two lane ang pikas dalan. Gitataw niya nga hingpit nilang  sirad-an ang dalan M.L. Quezon sa alas 5:00 ang takna sa hapon sa Abril 27 sa paghatag og higayon alang sa mga kalihokan nga pagahimoon nga naglakip sa street dancing , rampa ug uban pa. (BANAT NEWS)