Motunol og kuwarta sa botante dakpon

CEBU, Philippines - Nanganti ang kapolisan nga sikopon gayud nila  si bisan kinsa nga masakpan nilang motunol og kwarta ngadto sa mga botante.

Atol sa gipahigayong election security workshop sa kapolisan ang hepe sa kapolisan sa Police Regional Office, Chief Supt. Marcelo Garbo subling mipahimangno  sa tanang ground commander nga himoong  estrikto ang  pagpatuman sa no guns, no goons no, gold policy.

Kini nagpasabot nga gikinahanglang ilang ipatuman ang  comelec gun ban, sumpuon ang tanang mga armadong taw o   nga kadudahang   maghatag og  kasamok sa umaabot nga eleksyon. Kini  pinaagi  sa pagsikop ni bisan kinsa nga masakpang   manghatag  og   kwarta ngadto sa mga botante.

Giklaro usab ni Garbo nga seryoso sila sa ilang palisiya hinungdan nga nagplano pa sila karon sa  dugang  pang  ipahamtang sa  tawo  nga ilang masayran nga nag-vote buying. Matud pa ni Garbo nga ang ilang pagpahigayon sa maong workshop sa tanang ground commander usa ka pamaagi aron masayran niini ang mga posibling mahitabo atol sa election.

Dugang pa ni Garbo nga ila usab nga masayran kun unsa ang ilang angayang pagabuhaton sa uban  pang  mga  panghitabo  nga ilang mahimamat hinungdan nga dako kaayo og tabang kanila ang maong workshop.

Samtang gihagit usab ni Atty. Clarence Oaminal kinsa  usa sa mga speaker sa maong seminar ang kapolisan nga hugtanong makapatuman sa pagdili sa pagpamalit og botos  aron makab-ot ang hapsay ug limpyo nga piniliay karong umaabot  nga  Mayo 13.

Tinguha sa tanan nga  malinawon ug hapsay nga piniliay ang mahitabo karong   Mayo  ilabi na usab sa mga lugar nga gipaubos sa election watchlist susama sa kwatro distrito. (BANAT NEWS)