Seguridad sa mga korte huyang,mga piskal gustong mag- armas

CEBU, Philippines - Usa ka imbestigasyon ang gimando sa Korte Suprema tungod sa nahitabong pagpamusil sulod sa Palasyo de Hustisya sa siyudad sa Sugbo nga mikalas nila n Atty. Juvian Achas ug Dr. Rene Rafols ug ni-angol ni Piskal Maria Theresa Casiño ug napatay usab ang Canadian nga suspek nga si John Hodridge Pope.

Si Midas Marquez ang Court Administrator sa Korte Suprema gipadala dinhi sa Sugbo aron mosusi sa nahitabo ug alang sa pagpahigayon og imbestigasyon sa maong kaso.

Matud pa ni Marquez sa interview ni Leo Lastimosa sa TV Patrol Central Visayas nga huyang gyud ang seguridad sa Marcelo Fernan Hall of Justice. Usa sa nakitang kakulangon mao nga wala kini metal detectors.

Si Marquez sa linaing interbyu sa mga sakop sa media miingon nga relibohan ang duha ka gwardiyang nagbantay sa ganghaan sa korte nianang tungora ug temporaryong pabutangan og unom ka polis gikan sa Police Regional Office-7 ang maong edipisyo.

Sa samang report, si Casimero Madarang III, Bureau of Immigration-7 regional director miingon nga nagpuyo si Pope dinhi isip temporary visitor ug bulan sa Disyembre sa nakalabay nga tuig nakadawat na og deportation order si Pope.

Samtang nasuta nga si Pope usab nadeklarar na nga “undesirable alien” sa BI niadtong Oktubre 12 ug nalakip na sa blacklisted nga mga langyaw dinhi sa nasud.

Apan wala kini ma-implimentar kay mi-apelar pa ang maong langyaw ug dili pa usab kini madali-dali og palayas tungod kay daghan kining kasong giatubang dinhi.

Ang building administrator sa Marcelo Fernan Palace of Justice nga si Engr. Sagani Saranillo mosusi kung ang mga gwardiya nagpasagad lang sa ilang trabaho maong nakasulod ang armadong si Pope. Tungod sa nahitabo, nakanselar ang tanang hearing sa mga kaso kagahapong adlawa.

Tungod sa nahitabo subling nabuhi ang tinguha sa mga piskal nga magbaton og armas aron dunay ikapanalipod sa ilang kaugalingon sa higayon nga dunay mga tawong manuyo og dautan kanila. (BANAT NEWS)