P33B AIP giaprobahan sa Cebu City Council

CEBU, Philippines — Giaprobahan sa Cebu City Council ang Annual Investment Plan (AIP) nga dul-an sa P33 bilyones alang sa tuig 2025 atol sa hybrid special session niadtong Biyernes.

Ang maong AIP naaprobahan human ang tanang committee report sa mga item ubos sa AIP na-submit na ug naaprobahan sa konseho.

Apil sa mga committee report nga giaprobahan sa konseho mao ang Local Annual Cultural Development Plan sa Dakbayan sa Sugbo alang sa 2025 nga gipresentar sa Committee on Tourism, Arts, and Culture, ug giandam ni Konsehal Jaypee Labella.

Base sa mga report nga ang plano nagpasiugda sa pipila ka mahinungdanong mga inisyatibo sama sa paghandum sa lokal nga mga panghitabo sa kasaysayan; pagtuki kabahin sa mga kasaysayan ug mga panghitabo, ug ang pagpahigayon sa Cultural Awareness Week pinaagi sa lectures.

Gawas niini, gilatid usab sa plano ang ubang mga programa sama sa pagpausbaw sa kapasidad sa Cultural and Historical Affairs Office (CHAO) pinaagi sa pagkuha og mga experts alang sa cultural mapping ug barangay cultural profiling; pagpalambo sa museum sa Dakbayan sa Sugbo ug paghimo og Cebu City Heritage Watch nga gilangkuban sa heritage advocates.

Sa samang hybrid session, giaprobahan usab sa konseho ang laing committee report alang sa ubang AIP items sama sa Local Youth Development Plan (LYDP) nga gipresentar sa Committee on Youth and Sports Development pinaagi ni Konsehal Rhea Jacosalem.

Nahibaw-an nga ang LYDP nga gisumiter sa Local Youth Development Officer outdated nga version ug wala magpakita sa mga pagbag-o nga nahimo kaniadtong Pebrero 2024. Gihatagan usab og gibug-aton ni Jacosalem nga dugang namatikdan sa komitiba ang pagkawala sa tukma nga koordinasyon tali sa Local Youth Development Officer ug Office of the SK Federation President.

Ug gumikan niini, giaprobahan sa konseho ang pagbalik sa gisumite nga LYDP ug gimandoan ang Local Youth Development Officer nga isumite ang giusab ug updated nga LYDP.

Una nang gikataho nga opisyal nga gi-transmit sa Cebu City Development Council (CCDC) ang ilang AIP proposal nga adunay kinatibuk-ang kantidad nga P33,097,091,605, nga adunay breakdown nga P30,453,291,534 alang sa General Fund Proper ug P2,643,800,070 alang sa Special Accounts Fund. — /BDB (BANAT NEWS)