Sayo nga mobayad og buhis hatagan og discount

CEBU, Philippines — Gimandoan ni Gobernador Gwendolyn Garcia ang mga assessor sa mga local government units (LGUs) sa lalawigan sa Sugbo nga ang “due” sa bayranan sa real property tax adto sa Enero sunod tuig.

Adunay 10% nga discount alang niadtong makabayad og buhis sulod sa Enero 1 hangtod 31, 2025.

“While payments processed after March 31 will be subject to arrears” matud sa Kapitolyo pinaagi sa Sugbo News, ang news portal niini.

Ang pipila ka LGUs sa Probinsya, mihatag og diskwento nga 20 porsyento alang sa mga tag-iya og yuta nga “advance” ang bayad sa buwis karong bulana, o sa dili pa moabot ang sunod tuig.

Sa lungsod sa Samboan, Disyembre 27 ang ulahing adlaw nga gitagana aron makahatag og advance sa buwis.

Ang maong 20 porsyento nga discount maaplay sa real property sama sa yuta. Kun ang buhisan miabot sa P1,000, adunay P200 nga discount sa bayranan.

“Atong hinomdoman nga 2% ra sa reassessed value ang Real Property Tax (buhis) sa atong yuta ug permanent improvements niini. Modako lang kini kung dili ninyo atimanon sa pagbayad nga mahatagan kamo’g penalty tax (duplo)” sumala sa Facebook page sa LGU.

Ang lungsod sa Dalagute mihatag usab og 20% nga diskwento alang sa mga advance ang bayad sa buhis alang sa tuig 2025 kon diin matod sa LGU nga higayon kini aron malikayan ang taas nga linya ngadto sa Municipal Treasurer’s Office. Aduna usab online platform ang LGU alang sa dali ug sayon nga pagbayad sa buhis didto sa lungsod. — /MEL (BANAT NEWS)