Gilugwayan nga permanent danger zone tinguhang palapdan pa
CEBU, Philippines — Ang Office of Civil Defense (OCD) nagtinguha nga palapdan pa ang gipalugway nga permanent danger zone (PDZ) sa palibot sa bulkan tungod sa low-pressure area nga duol sa Mindanao.
Matud sa OCD nga ang low- pressure area (LPA) posibleng magdala og risgo sa lahar flow sa Negros Island hinungdan nga plano nila nga ibalhin ang evacuation centers gawas sa 14 km. radius gikan sa bulkan.
Matud ni Raul Fernandez, direktor sa OCD Western Visayas ug chairperson sa Task Force Kanlaon nga base sa assessment sa Phivolcs adunay dakong posibilidad sa explosive eruption bisan unsang orasa kini base sa padayong volacanic activity lakip niini ang volcanic earthquakes.
Sa kasamtangan, adunay 29 na ka evacuation centers sa Negros Island, samtang 10 ka family tents ang gi-set up sa La Carlota City, Negros Occidental.
Gitataw ni Fernandez nga base sa report sa Department of the Interior and Local Government, nakab-ot nila ang 99.17 porsiyento nga evacuation rate sa mga residente sa PDZ, nga mikabat sa 5,772 ka pamilya nga gilangkuban sa 18,475 indibidwal.
Sa laing bahin, ang National Disaster Risk Reduction and Management Council (NDRRMC) nibutyag nga PHP43.33 milyones na nga kantidad sa tabang sa gobiyerno ang gipaabot ngadto sa mga pamilya nga naapektohan sa pagbuto sa Mt. Kanlaon niadtong Disyembre 9, 2024.
Ang NDRRMC nitaho nga ang tabang, lakip na ang food packs, financial assistance, hygiene kits, modular tents, "sakolines," sleeping kits, laminated sacks, ug family kits nakabenepisyo sa 6,145 ka pamilya sa Western Visayas ug 1,859 sa Central Visayas o 8,004 ka pamilya sa kinatibuk-an apan gilaoman nga ang ang maong gidaghanon posibleng mapun-an tungod sa nagpadayon nga validation.
Gibutyag sa OCD nga adunay PHP240.5 milyones nga standby funds ug relief stockpiles nga anaa sa mga buhatan sa DSWD sa duha ka rehiyon lakip ang 186,328 ka family food packs. (BANAT NEWS)
- Latest
