HVCDP gihimo aron tutukan ang kabahin sa climate change
CEBU, Philippines — Pag-atubang sa hagit kabahin sa climate change mao ang gihimug-atan sa Department of Agriculture-Central Visayas (DA7) atol sa unang adlaw sa National High Value Crops Development Program (HVCDP) 2024 Third Quarter Assessment. Ang HVCDP nga gipahigayon didto sa Bohol nga gisugdan gahapon Nobiyembre 19 ug hangtud kini Biyernes, naghiusa sa mga eksperto ug mga lider sa agrikultura aron hisgutan ang mga estratehiya alang sa pagpalambo sa sektor ug paghimo sa mga programa ug proyekto nga makatabang sa mga mag-uuma nga mokita.
Si DA-7 Regional Technical Director, Engr. Cirilo Namoc niila sa nagkadako nga hulga sa dili matag-an nga panahon ug pagbag-o sa klima, ug nag-ingon nga "kapag ang panahon ang kalaban, mahirap itong labanan".
Gipadayag usab niya ang panginahanglan sa mga proyekto nga makasugakod sa klima ug maayong pagkaplano nga mga interbensyon gamit ang tulo ka estratehiya gikan sa 10-point development agenda, nga mao ang pagpalapad sa production areas, mekanisasyon ug marketing, isip basehanan.
Dugang niini, si DA Undersecretary for High Value Crops, Cheryl Marie Caballero, niingon nga bahin sa climate change, kinahanglan nga planohan kun unsay itanum, ug i-update ug i-adjust ang kalendaryo sa pagtanum.
Samtang, nagkanayon si Namoc nga ang DA nagkinahanglan og suporta sa mga LGUs, pribadong sektor, ug mga mag-uuma, kay dili makaya sa ahensya ang pagduso sa kalamboan sa agrikultura nga nag-inusara.
Sa laing bahin, giduso ni Caballero ang pagpataas sa konsumo sa utanon ngadto sa 120 kg matag tawo kada tuig, subay sa inadlaw nga rekomendasyon sa "Pinggang Pinoy" nga duha ka utanon ug usa ka prutas, aron madugangan ang demand sa lokal nga produkto.
Ang programa sa HVCDP nga "Gulayan ng Bayan" nagtumong sa paghimo sa pagkaon nga mas accessible ug available, sa pakigtambayayong sa Rural Improvement Club (RIC)—usa ka organisasyon nga gilangkuban kadaghanan sa mga kababayen-an ug mga inahan nga nagtutok sa pagpasiugda sa pagpananom og utanon. Lakip usab ang programa sa Department of the Interior and Local Government’s (DILG) nga "HAPAG" nga nagpasiugda sa pagpananom og utanon, pagtabang sa mga pamilya sa pagpatubo sa ilang kaugalingong pagkaon ug pagpalambo sa nutrisyon sa matag pamilya. (BANAT NEWS)
- Latest
