Abellanosa niduso og ordinansahon pagpanalipod sa service crew

CEBU, Philippines — Gitugyan sa Committee on Laws ug sa Committee on Labor and Employment, Cooperative and Livelihood alang sa pagtuon ang ordinansahon nga gipangamahanan ni Konsehal Jose Lorenzo Abellanosa.

Ang maong ordinansahon nag-ulohan og “Service Crew Protection Ordinance of Cebu City” nga  manalipod sa katungod ug dignidad sa mga service crew batok sa mga customer nga mohimo og dili makataronganon nga mga hangyo, pag-harass, pagpanghasi, pag-atake, pagpakaulaw og pagpabor batok sa mga empleyado.

Si Abellanosa angkanayon nga ang slogan nga “the customer is always right” aduna kini limitasyon ug dili kini usa ka lisensiya alang sa kustomer nga mohimo og dili makatarunganon nga mga buhat batok sa mga empleyado.

Gidili usab ang diskriminasyon sa mga service crew base sa kaliwat, ethnicity, grupo, kolor sa panit, gender, pinulongan, relihiyon, o estado sa kinabuhi.

Ug kon adunay dili mauyonan ang kustomer, ginadili usab ang pagkuha og hulagway o video niini nga maoy gamiton aron sa pagpakaulaw.

Tumong usab sa maong ordinansahon ang pagtubag sa mga katungdanan sa mga tag-iya o manager sa establisamento diin nagtrabaho ang service crew.

Ubos sa Section B sa ordinansahon ginadili ang pagtaktak sa mga service crew nga nabiktima sa mga dili makiangayon nga buhat sa usa ka kustomer.

Ang tigdumala kinahanglan nga mohimo og tukma nga mga lakang aron sa pagtabang ug pagtuboy sa mga katungod ug dignidad sa apektadong sakop.

Ubos sa maong ordinansahon, ang kustomer o tag-iya nga nakahimo og kalapasan pahamtangan kini og silot diin sa first offense makamulta kini og P1,000, o pagkabilanggo sulod sa dili molapas sa usa ka bulan.

Sa second offense, makabayad og P3,000 nga multa o pagkapriso sulod sa unom ka buwan ug sa third offense makabayad ogmulta nga P5,000 o pagkapriso sulod sa usa ka tuig o ang korte na ang magbuot sa tagal sa ipahamtang nga silot. (BANAT NEWS)