Mga senior citizen ug PWD ipalibre sa bayad sa CCSC
CEBU, Philippines — Si Konsehal Pastor “Jun” Alcover, Jr. mohangyo ngadto kang Acting Cebu City Mayor Raymond Alvin nga dili na pabayaron og entrance fee nga P20 ang mga senior citizen ug mga persons with disabilities (PWDs) diha sa Cebu City Sports Center.
Ang maong hangyo gipadangat niya pinaagi sa usa ka privileged speech atol sa ilang regular session niadtong Agosto 14, 2024 diin matud ni Garcia nga walay rason nga dili malibre sa bayranan ang mga senior citizen og PWDs sa maong pampubliko nga recreation center.
“Kay kong ilibre kini, mas makaagni sa atong mga senior citizens ug PWDs nga moanha maglakaw-lakaw mag-jogging ba ang uban para ma-promote mapataas pa ang ilang mga kinabuhi diha sa gitawag nato’g Cebu City Sports Center”, ni Alcover pa kinsa chairman sa senior citizens committee sa konseho sa siyudad.
Kasamtangang adunay P5 o 20 porsyento nga diskwento ang mga senior citizen ug PWD sa ilang pagsulod sa CCS.
Imbes nga P25 ang maong entrance fee nahimo nalang kining P20.
Ubos sa Akta Republika No. 9994 kun “Expanded Senior Citizens Act of 2010” adunay espesyal nga mga prebilihiyo ang mga senior citizen sama sa 20 porsiyento nga diskwento sa mga batakang palaliton ug mga kan-anan, ayuda, ug medikal nga benepisyo, ug uban pa.
Tumong sa balaod nga maharuhay ug komportable ang pagpuyo sa mga senior.
Subay usab sa lokal nga mga ordinansa sa Dakbayan sa Sugbo ang mga senior citizen makapahimulos usab og libre nga bayranan sa parking, apil na sa mga sinehan, gawas pa sa binuwan nga hinabang pinansiyal nga P1,000, o P12,000 matag tuig. BDB BANAT NEWS
- Latest
