Gipatay sa tanod

CEBU, Philippines — Mitahan sa iyahang kaugalingon ngadto sa kapolisan sa Dakbayan sa Talisay ang usa ka  barangay tanod kagahapon sa buntag, Martes, Agosto 06, 2024 ug mi-angkong nakapatay kini og tawo sa ilang barangay sa Candulawan.

Ang maong tanod  giila nga si Jeomar Castañares Alloso, 31, Purok Sambag, Barangay Candulawan sa naasoy’ng siyudad.

Mitahan kini sa police station dala ang matud pa kalibre .45 nga armas nga gigamit sa pagpusil-patay sa usa ka Virgilio Monterde Jr. 25-anyos nga taga Purok Kolis sa susamang barangay.

Ang patayng-lawas ni Monterde, nakaplagan pasado alas-2 sa kaadlawon niadtong  Domingo, Agosto 04, 2024 diha sa Purok Kamunggay, Candulawan.

Matud pa ni Police Lieutenant Col. Epraem Paguyod,  hepe sa Talisay City Police Station gikuyugan sa mga Barangay Officials si Alloso  sa pagtahan niini kagahapon sayo sa buntag.

Samtang sa pakighinabi sa Banat News pinaagi sa telepono kang ABC President, Candulawan Barangay Kapitan Josefina Concial gihimakak niini ang nanggawas nga estoryang gigamit ang Barangay Service sa pagbuhat sa krimen.

Dili sab matud pa tinuod nga dunay laing nalambigit nga mga barangay tanod sa maong krimen kay binuhatan lang kini sa maong suspek. Giingong nagsugod ang bikil sa suspek ug sa tanod duha ka bulan na ang nakalabay.

“Before ana nahitabo kining maguwang aning namatay magtiayon unya ang ugangan nangayo og tabang sa tanod sa barangay kay ang asawa gikulata, bun-og jud kaayo.  Girespondihan sa mga tanod mga two months (na ang nakalabay) giadto sa atong mga tanod, gibato sila unya gipusil sila ang bala jolin. Ang atong hepe sa tanod ni request nga makig estorya sa og settle-lon apan dili kini moatubang dili moari sa barangay hall aron ma estorya,” sigon ni Concial.

Dugang pa ni Concial pagsunod nga adlaw  gikatahong gipadad-an sila og usa ka bala nga gisulod sa karton.

“Tingali nahagit ba kaha ni akong tanod nganong gisendan man siya og bala sa armas,” sigon ni Concial.

Giklaro sab ni Concial nga wala niya tugoti nga magdala-dala og armas ang mga tanod tungod kay gidili kini.“ Ako wala jud ko nag provide og armas ani atong mga tanod kay bawal man. Ang ako ra jud gi provide ang batuta ra gyud wala nako kahibaw ngano naay armas ang atong tanod,” dugang ni Concial.

Si Police Lieutenant Colonel Paguyod miingon nga iyahang ipasusi ang maong armas, sa pagkakaron walay napakita nga papeles ang maong  nitahan nga tanod.

Usa sa ilang gitan-aw nga ‘personal grudge’ ang motibo sa maong krimen. IBM BANAT NEWS