Kampanya batok sa illegal nga sugal gihingusgan

CEBU, Philippines — Padayon nga gihingusgan sa kapolisan sa Central Visayas ang ilang kampanya batok sa illegal nga sugal ug pagmatuod niini mao ang pagkasikop sa upat ka indibidwal nga nalambigit sa illegal nga sugal nga swertres ug gani usa nila nakuhaan og illegal nga drugas.

Ang Sogod Police Station nagpahigayon og operasyon sa Barangay Poblacion sa maong Lungsod nga miresulta sa pagkasikop ni alyas Lando, 48 anyos, residente sa naasoy nga dapit.

Nasakmitan kini og gamit sa illegal nga sugal sanglit nagsilbi kining usher.

Apan dihang girikisa ang dinakpan sa usa sa mga police nakuhaan kini 0.05 gram nga shabu.

Nadakpan sab sa kapolisan sa Lungsod sa Sogod si alyas Rico, 43 nga nagpuyo sa Barangay Poblacion gumikan gihapon sa kalambigitan niini sa swertres.

Ang Dalaguete Police Station nakasikop usab kang alyas Eti, 52 anyos, nagpuyo sa Barangay Poblacion sa maong Lungsod dihang nagpahigayon sila og operasyon batok illegal nga sugal sa nahisgutang barangay.

Nakuhaan ang dinakpan og illegal gambling paraphernalia.

Samtang ang Santander Police Station nakasikop kang alyas Daisy, 37 anyos, molopyo sa Barangay Looc sa maong Lungsod dihang nihimo sila og operasyon sa Bunlan, Lungsod sa Santander.

Ang mga dinakpan pasakaan og kasong kalapasan sa Republic Act 9287 samtang kasong kalapasan sa Republic Act 9165 ang dugang kaso ipasaka batok kang alyas Lando. (BANAT NEWS)