Mga polis nga nakalas sa serbisyo gipasidunggan pagusab

CEBU, Philippines — Mga polis nga nisakripisyo sa ilang kinabuhi samtang naghimo sa ilang trabaho gipasidunggan sa Police Regional Office-7 (PRO-7) atol sa culmination ceremony sa ika-30 nga kasaulogan sa National Crime Prevention Week (NCPW).

Sumala sa press release sa PRO-7, samtang kining tibuok semana nga kalihokan nagpakita sa padayong paningkamot sa gobyerno aron pagpakgang sa mga krimen  nagsilbi usab kini nga kahigayonan sa paghinumdom sa walay kupas nga hiyas ug pagpasidungog sa kaisog ug katarong nga natampo sa kauban sa pwersa sa Philippine National Police (PNP).

Atol sa programa, giimbitar ang mga nailing kabanay sa mga polis nga nakabsan sa kinabuhi samtang naghimo sa ilang trabaho.

Si PBGen. Anthony Aberin, PRO-7 Regional Director, pinaagi ni PCOL Robert Lingbawan, Chief, RCADD 7, miingon nga mahinungdanon ang kontribusyon sa mga nakalas  kay nagpamatuod kini nga kapolisan andam mosakripisyo sa kinabuhi para sa pagpatuman sa balaod alang sa kalinaw ug paglambo sa nasud.

Matud pang Aberin duna silay mga estrahiya ug inisyatibang gihimo para sa pagpakunhod sa mga krimen, pagsiguro sa kaluwasan sa publiko, ug pagpalambo sa seguridad sa mga batan-on ug sa tibuok komunidad sa Central Visayas.

Ang NCPW karong tuiga nga gipangunahan sa National Police Commission (NAPOLCOM) - Regional Office 7 adunay tema nga: “Kabataan Tara na, sa Crime Prevention Kaisa Ka!” diin gihatagan usab og awards ug certifications ang mga NAPOLCOM Exam Topnotchers ug kaalayon nga ahensya sa NCPW. (BANAT NEWS)