Adopt an estero program gilusad sa Mandaue

CEBU, Philippines — Gihatagan karon og tukmang lakang sa paghimo og kasulbaran ang mga nasinati nga mga pagbaha sa Siyudad sa Sugbo ug Siyudad sa Mandaue sa matag higayon nga mobundak ang kusog nga ulan Kini ilang gihimo pinaagi sa gipahigayong signing sa Memorandum of Agreement sa Adopt-An-Estero/Waterbody Program.

Mipirma og memorandum of agreement ang kagamhanan sa Mandaue City ug Cebu City uban sa Department of Environment and Natural Resources Region 7, Environmental Management Bureau, Region 7, ug mga Company nga nahimutang kilid sa sapa.

Sa memorandum of agreement gikasabotan ang programa pagtinabangay pagpanglimpyo sa sapa, pag-instalar og mga trap sa basura, pagpananom og mga kawayan aron pagsulbad sa problema sa pag-awas sa tubig-baha.

Si Acting Mayor Glenn Bercede nagdasig sa mga kompanya nga nahimutang kilid sa sapa sa pagsunod sa insakto nga pamaagi sa paghipos sa mga basura aron maprotektahan ang Butuanon River ug gipahinumdoman usab ang katawhan sa responsable nga paglabay sa ilang mga basura.

Nisaksi sa pagpirmahanay og kasabotan si City Councilor Jen Del Mar ug ang mga sakop sa Mandaue City Environment and Natural Resources, mga company partners, ug Barangay Officials.