P18M shabu, 40 nasikop

CEBU, Philippines — Niabot sa 33 ka anti-illegal drug operations ang gilusad sa Police Regional Office(PRO)-7 gikan sa Hulyo 19 hantod sa Hulyo 20, 2024 nga miresulta sa pagkasikop sa 40 ka drug suspects ug nakompiskar ang  2,623.88 grams nga shabu nga nagkantidad og dul-an P18 million.

Usa sa mga operasyon nga nahimo sa PRO-7 mao ang buy-bust operation nga gihimo sa Police Drug Enforcement Unit ug Cortez Municipal Police Station sa Bohol Police Provincial Office nga miresulta sa pagkasikop sa duha ka high-vakue srug suspects.

Nakuhaan ang mga suspetsado og 1,450 grams nga shabu nga nagkantidad og P9.8 million ug ubang drug paraphernalia.

Laing police operation nga gipangaluhan sa PDEU pinaagi sa pakig-alayon sa Sibulan Municipal Police Station sa Negros Oriental Police Provincial Office nga miresulta sa pagdakop sa usa ka lalake nga drug suspect diin nakuhaan kini og 422.60 grams nga shabu nga mobalor og P2.8 million ug drug paraphernalia.

Nakakompiskar sab ang PRO-7 og 295 grams nga shabu nga niabot og kapin P2 million gikan sa usa ka lalakeng suspetsado sa buy-bust operation pinangulohan sa Police Station 10 sa Cebu City Police Office.

Ang maong mga operasyon gipatuman subay sa mando ni PRO-7 Regional Director Brigadier General Anthony Aberin nga hingusgan ang police operations isip usa sa mga preemptive measures aron masiguro nga ang umaabot nga ikatulong State of the Nation Address ni Presidente Ferdinand "Bongbong" Marcos Jr., hapsay ug luwas. (BANAT NEWS)