Delegado nasalisihan sa venue

CEBU, Philippines — Usa lang ka kaso sa krimen nga naglambigit sa delegado sa Palarong Pambansa 2024 ang natala sa Cebu City Police Office(CCPO) gikan sa pagsugod sa kalihukan hangtod kini natapos kagahapon Hulyo 16, 2024.

Ang krimen nahitabo sa usa ka sports venue alang sa duwa nga table tennis diin nataligam-an sa player iyahang gamit ug nawala.

Nawad-an kini og personal nga butang sa dihang iyang gibutang sa usa ka lugar ang iyang bag samtang padung na siya nga moduwa.

Sa iyang pagbalik naa pa ang iyang bag apan wala na ang sulod niini ug walay nakabantay ang mga tawo sa palibot.

Nagkanayon si Police Lieutenant Colonel Janette Rafter, Deputy City Director for Operations sa Cebu City Police Office nga padayun ang ilang imbestigasyon sa maong hitabo.

Sulod sa duha ka semana nga mga kalihukan sa Palaro gihulagway sa CCPO nga malampuson kining napahigayon bisan wala pa hingpit nga manguli ang mga delegado sa nagkalain-laing rehiyon.

Hugot nga siguridad ang gipatuman sa closing ceremony apan dili na kini susama sa pag bukas niadtong Hulyo 9, 2024 tungod sa presensya ni President Ferdinand Bongbong Marcos Jr sa Cebu City Sports Center. — IBM  BANAT NEWS