Garcia mosuporta Sinulog 2025
CEBU, Philippines — Si Gobernador Gwendolyn Garcia mipasalig nga iyang suportahan ang Cebu City sa Sinulog 2025.
“You can expect our more than one hundred thousand percent for the Sinulog. Unya kanang mosulti baya ta we put our money where our mouth is,” matud pa ni Garcia ngadto kang acting Cebu City Mayor Raymond Alvin Garcia sa coordination meeting niadtong Biyernes para sa Pasigarbo sa Sugbo 2024.
Ang acting mayor kinsa pag-umangkon sa gobernador, mianunsyo ngadto sa publiko nga iyang ibalik ang Sinulog 2025 ngadto sa Cebu City Sports Center niadtong Miyerkules atol sa nahitabong One Cebu Expo sa SM Seaside Cebu City.
Segun sa gobernador, nga mabalik na gyud ang mga tawo ug manan-away ilabi karon nga mabalik na sa sentro ang maong selebrasyon.
“Actually, mobalik na gyud ‘tong daghang tawo kung ari sa city sports. Kay naa naman ang parade, ang tanan, mobalik ang kasadya sa Sinulog,” matud ni Garcia kay para niya, mao kini makapahimuot sa Balaang Bata.
Gikomparar ni Garcia ang kaniadto mga Sinulog nga moabot og milyon ka tawo ang mosaksi nga wala na mahitabo sa nakalabay nga duha ka Sinulog nga anha gihimo sa SRP.
“So, I think mobalik gyud na especially the good news is out that it will no longer be held at the SRP but right here at the heart of the city, sa Cebu City sports, salamat gyud kaayo mayor daghan kaayo nalipay ana nga announcement,” dugang niya.
Sa pagdumala ni mayor Mike Rama, nga ubos karon sa preventive suspension, duha na ka tuig nga sa South Road Properties gipahigayon ang Sinulog Festival.
Apan karong tuiga, ang Sinulog sa Kabataan sa Dakbayan ug ang Sinulog sa Kabataan sa Lalawigan gisaulog sad sa CCSC. (BANAT NEWS)
- Latest
