Transition team andam na kun mapatuman ang suspension ni Cortes

CEBU, Philippines —  Gipadayag ni Mandaue City Mayor Jonas Cortes nga andam na ang transition team sa higayon nga mapatuman na ang iyang usa ka tuig nga suspension.

Nagkanayon si Cortes nga si Vice Mayor Glenn Bercede, kinsa dugay na usab sa politika ang andam na sa paghulip sa iyang pwesto ingon man ang mga miyembro sa konseho sa siyudad nga mosuporta usab sa maong transition.

Dugang sa mayor nga magpabilin ang iyang mga office staff ingon man ang mga department heads. “These are the same people who helped me in managing our city, so way mausab, mao ra gihapon,” suma pa ni Cortes.

Nadawat ni Cortes ang order of suspension sulod sa usa ka tuig nga walay sweldo gikan sa Office of the Ombudsman human siya mahukmi nga guilty sa grave misconduct and conduct prejudicial to the best interest of the service niadtong August 21, 2024.

Apan wa pa mapatuman ang maong kamanduan tungod kay wa pay implementing order.

Gipahibawo ni Cortes nga ang tanang proyekto sa dakbayan sa Mandaue apil na ang groundbreaking sa P3 billion nga kantidad sa bag-ong Government Center magpadayon.

“Padayon gihapon ang tanang ongoing projects including the groundbreaking of our long overdue new government center nga hagbay ra gyud gipangandoy sa mga Mandauehanon,” suma pa ni Cortes.

Mipadayag usab og kahibung si mayor Cortes kun nganong nahukman siya sa Office of the Ombudsman tungod kay dunay susama nga panghitabo kaniadto sa administrasyon ni kanhi City Mayor Luigi Quisumbing kinsa nitudlo usab ug officer in charge sa City Social Welfare Services Office, nga dili social welfare graduate.

“Ang kadto nga kaso gi dismissed man unya kaning akoa, kay suspension man gyud and one year of suspension, I think is too harsh,” segun pa ni Cortes.  

Dugang pa ni Cortes nga sa panahon nga siya masuspenso ipunting niya ang iyang atensyon sa community services ug way makapugong kaniya sa pag-alagad sa mga Mandauehanons. (BANAT NEWS)