Opisyales sa Compostela nitapon na sa One Cebu
CEBU, Philippines — Ang tanang opisyales sa Lungsod sa Compostela gikan sa mayor, bise mayor mga konsehal sa lungsod lakip na sa mga kapitan ug konsheal sa barangay ug Sangguniang Kabataan ang nitapon na sa partido sa Probinsiya sa Sugbo nga One Cebu.
Si Compostela Mayor Felijur Quiño ug Bise Mayor Froilan Quiño uban sa 280 ka politikong opisyales sa lungsod ang nanumpa sa pakig-alyansa sa One Cebu ang partido nga gipangulohan ni Gobernador Gwendolyn Garcia.
Si Garcia maoy nipahural sa maong opisyales sa lungsod niadtong Hulyo 15, 2024 diha sa D.M. Reynes Gymnasium.
“We are a united province, and in this unity, the entire country has taken notice. There is no other province as strong, because we are united; no other province in the entire country can say that indeed we are one, undivided, and indivisible. Only One Cebu”, matud ni Garcia sa iyang mensahe atol sa maong kalihokan.
Ang Compostela maoy pinakaulahi nga LGU sa kinto distrito kansang mga lider nanumpa sa pakighiusa sa partido ni Garcia.
Niadtong Nobiyembre 2022, una nga nanumpa ug nakig-alyansa ang opisyales sa upat ka lungsod sa Isla sa Camotes nga gilangkuban sa Poro, San Francisco, Pilar ug Tudela nga kaniadto sakop sa oposisyon.
Sa kinto distrito, ang Siyudad sa Danao na lang ang nagpabilin sa oposisyon karon nga gipangulohan sa mga Durano.
Niadtong buwan sa Enero niining tuiga, si Bogo City Mayor Carlo Jose Martinez, Vice Mayor Mayel Martinez ug Board Member Celestino “Tining” Martinez III maoy nangulo sa opiysales gikan sa barangay hangtud sa siyudad sa pagtapon sa One Cebu. — BDB BANAT NEWS
- Latest