Nalataya'g trak, patay’

CEBU, Philippines — Patay ang usa ka 32-anyos nga motorista samtang angol usab ang ig-agaw niini nga menor nga angkas niini human sila nabanggaan og trailer truck sa National Highway sa Barangay Cansaga, Consolacion niadtong Lunes sa hapon, Hunyo 24, 2024.

Giila ang mga biktima nga si Sherwin Sumanting, drayber sa motorsiklo ug ang ang angkas nga menor nga si alias ‘Jev’, 16-anyos nga parehong residente sa Barangay Pulpogan Consolacion.

Samtang ang drayber sa trailer truck mao si Mark Vincent Lucero, taga Barangay Corte, lungsod sa Carmen.

Matud pa ni Traffic Investigator, Police Staff Sergeant Gemini Adalim, nasuta nga pareha kini’g destinasyon paingon sa Liloan.

Nag-una kining motor sa mga biktima ug nagsunod ang trak, apan pag-abot sa eskina sa Cansaga gikatahong kalit kining mi left-turn nga wala mabantayi sa drayber sa truck hinungdan nga nalamba ang duha ug diha dayon nalatayan sa ligid si Sumanting.

Dali nga niresponde ang kapulisan sa Consolacion og gidala ang driver sa motorsiklo ug ang angkas niini sa tambalanan apan gi deklarar si Sumanting biktima nga dead on arrival.

Kaso nga reckless imprudence resulting in homicide and physical injuries ug damage of property ang ipasaka batok sa suspek kinsa temporaryong gikustodiya sa kapolisan.

‘“Magbantay ra gyud sa kanunay, yesterday uwan-uwan man to, its either nakahatag sab to’g hinungdan ang uwan tungod sa kadangog sa dan. Anytime sa ilang pag-drive dili man gyud nato malikayan ang disgrasya, mag-amping, mag keep distance gyud para if ever, anaay mokalit og hunong sa atubangan or mominor naa pay time to brake or likayan pa natong posibleng mahitabo,” tambag pa ni Adalim sa mga drayber.-- John Mark P. Dejito ug Irish L. Laborte, PIT ug CNU Interns, IBM BANAT NEWS