Pagrespito sa bandila sa Pilipinas gipahinumdum sa mga opisyal

CEBU, Philippines — Gipahinumdum sa kadagkuan sa kagamhanan sa dakbayan sa Sugbo ngadto sa katawhan nga mobalik gyud sa gigikanan apil na ang paghigugma ug pagrespito sa bandila sa Pilpinas, nonot sa pagsaulog sa National Flag Day.

Gipadayag ni Acting Mayor Raymond Garcia nga gumikan sa impluwensiya nga gidala sa ubang kanasuran nganhi sa nasud usahay makalimot na kita sa atong kaugalingon nga identity isip Filipino.

 “We are very much influenced by the outside world and sometimes we forget that we are Filipinos and we forget our identity as Filipinos,” suma pa ni Garcia atol sa lecture nga gihimo sa National Historical Commission of the Philippines (NHCP). Gihimug-atan usab ni Garcia ang pagka Cebuano.

“I want to take it a step further. We are not only Filipinos but more importantly we are Cebuanos,” dugang pa ni Garcia.

Subay niini si acting Vice mayor Donaldo “Dondon” Hontiveros, nipahinumdum usab sa mga empleyado nga adunay flag sa ilang matag opisina.

Ang maong kalihukan gitambongan sa nagkalain-laing departments ug opisina sa City Hall ingon man sa DepEd-Cebu City ug Boy Scouts and Girls Scouts of the Philippines.

“Make sure nga naay flag. It is our way of recognizing the efforts of our forefathers,” suma ni acting Vice Mayor Hontiveros.

Ang kalihukan nga gipanguluhan sa NHCP’s senior researcher Juan Paolo M. Calamlam nituki usab kabahin sa mga desinyo sa bandila sa Pilipinas ingon man sa sakto nga pag-display niini apil na ang protocols sa flag raising and lowering ceremony ug uban pa.

Niadtong May 23, 1994, dunay Executive Order No. 79 nga giisyu nga naglugway sa period sa pagselebrar sa National Flag Day ug dili lang sa May 28, kundili gikan sa Mayo 28 hangtud na sa Hunyo 12.

Ang tanang Filipinos giawhag sa pag-display sa Philippine flag sa tanang opisina, ahensya ug mga instrumento sa gobyerno, business establishments, schools, ug mga pribadong panimay sud sa panahon sa kasaulogan sa National Flag day segun sa awhag sa DILG.

Kini maoy agig paghatag og respito sa simbolo sa national sovereignty ug solidarity. Gikan sa The Freeman/MEL