TFGB gipangayoan og short term plan pagpangandam sa La Niña

CEBU, Philippines — Si Cebu City Acting Mayor Raymond Alvin Garcia nangayo og short-term plan sa Task Force Gubat sa Baha pagpangandam sa La Niña.

Gusto ni Garcia nga mapangandaman ang nagsingabot nga uwan hinungdan nga giawhag niya ang task force nga moduso og short term plan.

Niadtong Miyerkules, si Garcia ug Melquiades Feliciano, chief implementer sa task force ang nagtagbo.

Si Garcia mapasalamaton usab sa tanang mga balay patigayon ug sa mga namuyo sulod sa 3-meter easement sa Estero de Parian nga nituman sa mga gipatuman sa task force.

Samtang adunay mga balay patigayon ang gipadalhan na usab og 72 hour notice niadtong Miyerkules human nga adunay tipik sa ilang estraktura ang nasulod sa 3-meter easement diha sa Sindulan Creek.

Nasayran nga walo nalang gikan sa 32 ka establisamento nga anaa sa Estero de Parian ang wala magtagad sa notisya nga gipadala ngadto kanila ug posibleng irekomendar sila nga pasirad-an.

Sa laing bahin, nakig-alayon karon ang City Engineering Office (CEO) sa Siyudad sa Mandaue sa Department of Public Works and Highways (DPWH)-7 alang sa pagpanglimpiyo sa mga kanal nga nagsubay sa nasudnon nga mga dalan.

Naglakip sa ilang gilimpiyohan ang drainage sa A.C. Cortes Avenue sa Barangay Looc sa maong siyudad

Gipang-ukab sa mga sakop sa nahisgutang buhatan ang mga manhole ug gipanghabwa ang mga basura ug lapok nga nakabara sa pagdagayday sa tubig.

Nasayra nga gimando ni Mayor Jonas Cortes ang pagpanglimpiyo sa mga kanal sa kabarangayan isip pagpangandam sa panahon sa ting-uwan sa sunod nga bulan niining tuiga. — Rowena D. Capistrano ug BDB BANAT NEWS