Patik sa mga polis ipapapas

CEBU, Philippines — Mga polis nga adunay mga tattoo sa bisan asang bahin sa lawas nga dili matabunan sa ilang uniporme ipapas subay sa bag-ong gipagawas nga Memorandum Circular sa PNP niadtong Marso 19 ning tuiga.

Ang Police Regional Office(PRO)-7 gikatakdang moimbentaryo sa ilang mga sakop kun kinsa nila ang mga patikan.

Kadtong ang mga tattoos matabunan ra sa uniporme dili na kinahanglan tangtangon apan ang police mo-execute og affidavit kung unsa ilahang tattoo, asa dapita ug dunay undertaking nga himoon nga dili na nila kini padugangan pa.

Sa mga gustong mo-apply sa PNP kinahanglan wala gyud sila’y tattoo ug kun naa man gani ipatangtang gyud kini. 

“Dapat mo apply ka nga wala kay tattoos, if you have tattoos probably you need to remove it but this is crucial for those who are already in service nga naay tattoo. If pag mag uniform unya dili ma cover ang tattoos sa uniform then you are advised to remove the tattoos,” sigon ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin.

Giklaro ni Lt. Col. Pelare nga wala sila mag-ingon nga ang tattoo kay ngil-ad ug dili sab kini diskriminasyon sa mga dunay mga tattoo.  Gipasabot sa PRO-7 nga kun moapil PNP organization dunay estriktong regulasyon nga kinahanglan sundon ug nasayod na silang daan sa pagsud palang nila pagka polis.

“Again, the PNP respects freedom of expression, if is it art to you we respect that but for all members of the PNP we have rules and regulations to follow and when you enter the PNP they already that we have strict regulations especially in maintaining our image of professionalism and propriety especially if you are wearing uniform,” sigon ni Pelare.

Giklaro hinuon ni Pelare nga dugay na kini nga polisiya, ang nahitabo lang karon, apilon na kadtong aktibong mga polis nga kinahanglang walay makitang tattoo sa ilang lawas nga di matabunan sa ilang uniporme.

Magatubang og kasong administriba o uban pa kadtong dili mosunod sa maong polisiya subay sa kamandoan sa PNP. IBM BANAT NEWS