OIC sa LCPO gustong ilahugay ang mga sakop

CEBU, Philippines — Gitinguha sa  Officer-In-Charge (OIC) sa Lapulapu City Police Office nga mopatuman paglahugay sa mga polis nga dugay na nadestino sa ilang mga pwesto o buhatan.

Si OIC City Director, Coronel Ali Baron mipadayag niining mao niyang tinguha sa press briefing nga gipahigayon niadtong miaging adlaw.                                    

Matud pa niya nga sa dili pa siya mohimo sa maong lakang iyang susihon ang lima ka police stations ug mga special units sa LCPO kun kinsa kanila ang dugay na sa ilang pwesto.

Gusto ni Baron nga mabalhin silasa laing station o ubang unit sa LCPO.

Matud pa ni Baron nga apil sa ibalhin og pwesto ang mga opisyal nga sakop sa directorial staff sa LCPO headquarters.

Hinuon siguraduhon niya kun dunay makasunod sa trabaho sa kasamtangan niini nga naghupot sa pwesto.

Giklaro hinuon niya  nga mohangyo una siya sa Police Regional Office maong lakang nga iyang pagahimuon tungod kay subay sa lagda  dili siya makapatuman sa lahugay isip usa lang ka OIC.

Gawas kun siya na gayod ang mapilian ni Mayor Junard "Ahong" Chan nga maoy mahimong City Director. Dugang pa ni Baron  nga demokrasya ang iyang pamaagi  sa iyang pagdumala sa kapolisan  o ikunsulta una niya ang iyang mga  sakop sa dili pa niya ipagawas  ang maong  desisyon may labot sa palisiya sa ilang buhatan.

Sa nasayran si Baron kasamtangang gipuli sa multi-awarded nga kanhi LCPO City Director , Coronel Elmer Lim  kinsa nagpaabot na karon sa iyang promosyon. (BANAT NEWS)