Pito ka durugista sikop, P20 milyong shabu sakmit sa PRO-7
CEBU, Philippines — Nadakpan atol sa buy-bust operation sa Philippine Drug Enforcement Agency (PDEA)-7 Regional Special Enforcement Team ug Cebu City Police Station 10 ang pito ka suspetsadong durugista ug gipuhag usab sa kapolisan ang drug den niadtong Lunes diha sa Barangay Labangon, Dakbayan sa Sugbo.
Nasikop atol sa buy-bust operation ang subject ingon man ang tigmentinar sa drug den nga si Ray Luna alyas “Tata”, 43-anyos, walay trabaho.
Lakip sa nasikop mao sila si Jestoni Pineda, 34, pedicab driver; Angelo Vallecera, 31, walay trabaho; Rogelio Nisas, 35, garbage collector; John Cabido, 26, wala'y trabaho; Rowel Alquizar, 40, pedicab driver; ug Janel Quijano, 23, pedicab driver usab kinsa giingong naatlan sa mga polis nga naggamit og illegal nga drugas diha sulod sa drug den.
Nakompiska sa kapolisan ang upat ka putos nga shabu nga nitimbang ngadto sa 12 gramos ug nikantidad ngadto sa P81, 600, buy-bust money ug nagkalain-laing drug paraphernalia.
Nasuta nga si Luna maka-dispose og 30 gramong shabu matag semana.
Sa laing bahin, gikan sa Abril 1 hangtud sa 6, 2024 ang PRO-7 pinangulohan ni Police Brigadier General Anthony Aberin nakakompiska og P20 milyones nga balor sa ilegal nga drugas.
Sa maong mga buwan ang kapolisan nakapahigayon og 64 ka operasyon batok sa ilegal nga drugas diin niabot ngadto sa 3,069.53 ka gramo nga shabu ang ilang nasakmit.
Niabot usab sa 75 ka drug personalities ang nasikop sa maong operasyon. BDB BANAT NEWS
- Latest
