226 ka pamilya sa Mandaue nigradwar sa 4Ps

CEBU, Philippines — Niabot ngadto sa 226 ka pamilya sa Dakbayan sa Mandaue ang nigradwar sa Pantawid Pamilyang Pilipino Program (4Ps) sa Department of Social Welfare and Development samtang 793 ka pamilya ang bag-ong na-enroll ubos sa poverty alleviation program sa gobiyerno.

Ang maong 226 ka pamilya na-validate na kini isip non-poor ubos sa Listahanan 3 household assessment, samtang ang uban nakonsidera nga self-sufficient ubos sa Social Welfare Development Indicator (SWDI) nga gipahigayon sa DSWD.

Nasayran nga ang nigradwar sa 4ps naggikan kini sa nagkalain-laing lugar sa siyudad diin dili na sila dependent sa suporta ubos sa maong programa.

Ang 4ps nagsilbi kining national poverty reduction strategy ug human capital investment program nga maghatag og conditional cash transfer sa mga kabus nga pamilya sulod sa maximum period nga pito ka tuig, pagpauswag sa panglawas, nutrition, edukasyon sa kabataan nga nag-edad sa 0 ngadto sa 18-anyos.

Samtang niabot ngadto sa 4,156 ka pamilya nga beneficiaries ang nigradwar usab sa 4Ps in Region-7 sa tuig 2023.

Si DSWD Regional Director Shalaine Marie Lucero nitumbok sa pagtinabangay sa nagkalain-laing national government agencies, local government units, ug ang civil society organizations sa pagpauswag sa kalidad sa kamhimtang sa mga pamilya.

Giawhag ni Lucero ang mga nigradwar sa programa sa pagpadayon sa kakugi ug dili hikalimtan ang ilang  mga liksyon nga nakat-onan pinaagi sa monthly nga Family Development Session tungod kay magamit nila kini sa pagkab-ot sa ilang mga pangandoy.

Ang tumong sa SWDI mao ang pagdeterminar ug pag-monitor sa progress sa pamilya ug facilitate sa case management alang sa sustainable transition gikan sa kalisud.

Samtang nikabat ngadto sa p106.335 bilyones ang gigahin nga pundo ubos sa FY 2024 General Appropriations Act ngadto sa 4Ps diin target nila nga i-assist 4.4 milyones ka eligible households sa nasud.

Giklaro ni Secretary Mina Pangandaman sa Department of Budget and Management (DBM) nga ang P106.335 bilyones nga gigahin sa 4Ps dako kini kompara sa P102.610 bilyones sa nilabay’ng tuig ubos sa 2023 GAA.

Matud sa DBM nga ang maong allocation nag-cover sa health subsidies nga P750 matag buwan ug P600 matag buwan sa rice subsidies alang sa 4.4 milyones ka pamilya.

Ug nag-cover usab kin isa education subsidies nga nag-range gikan sa P300 ngadto sa P700 matag buwan alang sa 7 milyones ka estudyante. — /BDB (BANAT NEWS)