Dialysis Center sa Talisay padayong nanawat og mga pasyente

CEBU, Philippines — Padayon na nga nidawat og mga pasyente ang Dialysis Center sa Dakbayan sa Talisay.

Kini ang gipahibawo ni Mayor Gerald Anthony  Samsam  Gullas, Jr..

Matud ni Gullas nga 28 beds ang anaa sa Dialysis Center diin mao kini ang iyang gipangandoy niadto pang tuig 2019.

Gipadayag ni Gullas nga nakita niya ang kalisod sa usa ka pamilya nga ang sakop niini kinahanglan og dialysis nga mobiyahe pa ngadto sa layo.

Karon ang mga Talisaynon nga nagkinahanglan og dialysis ang anha na lang sa city hall compound diin nahimutang ang dialysis center.

Gawas niini, ang PhilHealth nitanyag og 156 ka session sa P2,600 matag session ug P1,000 matag semana ang ihatag sa siyudad.

Sa laing bahin, target sa City Veterinarian Office sa Siyudad sa Talisay nga wala na sila y madakpan nga iro nga adunay rabies karong tuiga.

Si Dr. Ma. Christine Hope Dejadena, city veterinarian sa siyudad nagkanayon nga ang rabies delikado kini kong motakboy sa iro ug makapaak og tawo.

Daghan karon ang nagbuhi og iro ug kinahanglang masayod sa paagi niini aron luwas ang pamilya ug mga tawo nga nagpalibot.

Gisaulog karon ang rabies awareness month hinungdan nga nitanyag ang buhatan sa City Veterinary Office og libreng serbisyo.

Ang mga libreng serbisyo gilangkuban sa anti-rabies vaccination, deworming, vitamin supplementation, spay, neuter ug libreng konsultasyon.

Matud ni Dejadena nga sa mosunod nga mga adlaw mosuroy ang taga city vet ngadto sa kabarangayan.

Nasayran nga duha ka tuig ang nilabay nakatala ang ilang buhatan og tag duha ka kaso nga adunay rabies nga mga iro. Sa niaging adlaw nakahatag sila og 312 ka anti-rabies vaccination, 189 ka dewormed, 233 ka vitamin supplementation ug 72 ka spayed ug neutered. (BANAT NEWS)