Lalaki nahadlok, nikatkat sa lubi sa lungsod sa Argao

CEBU, Philippines — Human sa duha ka gabii nga pagpundo sa ibabaw sa punoan sa lubi nikanaog na kagahapon sa alas 8:00 sa buntag ang 33-anyos nga lalaki sa Barangay Panadtaran, Lungsod sa Argao.

Gikataho nga alas 10:00 sa gabii niadtong Martes nikatkat sa lubi ang maong lalaki.

Matud ni Police Major Ivy Bartolome, hepe sa Argao Police Station nga sa wala pa ang insidente ang maong lalaki nidagan kini tungod kay giingong adunay naggukod kaniya nga lima ka tawo ug gusto siya’ng patyon sa maong mga tawo ug dayon nikatkat kini sa lubi.

“Base on on-going investigation so far wala naman pong ganung pangyayari base sa mga kapitbahay at mga tao sa lugar nga naay lima ka tao”, padayag ni Bartolome.

Ang maong lalaki nikanaog kini gikan sa lubi diin nagtuo ang kapolisan nga gikapoy na kini didto sa ibabaw sa lubi.

Ang maong lalaki gipakaon kini sa iyahang pamilya tungod kay gigutom unya gipapahuway.

“As of today(kagahapon) kalma naman siya, gikapoy pod siguro siya gipapahuway sa balay sa iyang paryente pod while waiting sa kapolisan kaganina nga moabot sa area”, ni Bartolome pa.

Nasayran nga ang pamilya sa maong lalaki nangayo og tabang sa kapolisan aron dalhon kini diha sa DOH Treatment and Rehabilitation Center sa lungsod tungod kay nakadesiyon sila nga ipa-rehab kini.

Wala gisalikway sa kapolisan ang posibilidad nga nakagamit og ilegal nga drugas ang maong lalaki dihang nikatkat kini sa lubi samtang gisubay usab nila kon nalakip ba kini sa surrenderees kaniadto. — BDB BANAT NEWS