Duha nga nananom og marijuana naaktohan

CEBU, Philippines — Nasikop sa mga tinugyanan sa balaod ang duha ka gitumbok nga marijuana planters  atol sa operasyon diha sa kabukiran sa Sitio Ylaya, Barangay Manipis, Dakbayan sa Talisay, Miyerkules sa hapon, Pebrero 14, 2024.

Ang mga dinakpan usa ka mag-uuma ug kauban niini nga nag-edad og 45-anyos nga usa ka security guard. Ang duha pulos residente sa Sitio Mangilamon, Barangay Jaclupan sakop gihapon sa Talisay City.

Ang operasyon gilusad sa hiniusang operatiba sa Provincial Intelligence Unit, First Provincial Mobile Force Company, Philippine Drug Enforcement Agency ug Talisay City Police Station.

Naaktuhan gyud matud pa ang duha nga nangguna sa yutang dunay daghang tinanom nga marijuana sa lugar. Ang lugar nga ilang gitamnan bakilid ug lisod tultolon. Nakompiskar sa mga tinugyanan sa balaod ang 40 ka punoan sa marijuana nga dunay standard drug price nga P16, 000. Pasakaan og kasong kalapasan sa Section 16 sa Republic Act 9165 ang mga suspetsado.

Si Cebu Police Provincial Office Director Colonel Percival Zorilla  mipasalig nga puhagon gyud ang marijuana plantations sa probinsya.

Ang sagad nga tiggamitan og marijuana maoa ng mga kabataan sanglit mas barato kini kun itandi sa shabu ug ubang synthetic illegal drugs. (BANAT NEWS)