PRO-7: Mga tawo “mature” na karon bahin sa pabuto

CEBU, Philippines —  Gihulagway sa Police Regional Office (PRO)-7 nga nagpakita og ‘maturity’ ang mga tawo kabahin aning paggamit og pabuto sa pagsugat sa mga okasyon sa Disyembre nga mao ang Pasko ug Bag-ong Tuig, ug nakita nila kini base sa mga natala nga kaso sa nabuthan og pabuto sa Central Visayas.

Sa datos nga gipagawas sa Department of Health Central Visayas 49 porsiyento ang pagkunhod sa firecracker related incidents sa Central Visayas gikan sa Disyembre 21 sa alas-6 sa buntag hangtod sa Enero 1, 2024 nga naa lang sa 41 ka firecracker-related incidents itandi sa samang period sa miaging tuig nga niabot og 80 ka kaso.

Matud ni Police Lieutenant Colonel Gerard Ace Pelare, tigpamaba sa Police Regional Office(PRO)-7 nga base sa report sa mga City ug Provincial Directors sa nagkalain-laing Police Offices malinawon ang pagsugat sa Bag-ong Tuig.

Ginagmay lang nga firecracker-related incidents ang natala ug wala say natala nga dunay naigo sa stray bullet o kaha saag bala.

“Kining tanan nga atong na-record of course due to our proactive stance, nakita man ninyo ang atong Regional Director ug atong member sa command group nga nagtuyok-tuyok gyud to check and make sure the plans are implemented well,” sigon ni Pelare.

Usa sab sa nakatabang aron makab-ot ang malinawon nga pagsugat sa Bag-ong Tuig mao nga bisan og mga polis naka-break apan nihimo lang gihapon sila sa ilang trabaho isip usa ka diha sa ilang mga dapit.

Gihangop nga mabulokon sa mga Mandauehanon ang Bag-ong Tuig 2024 pinaagi  sa ilang panagtapok sa Heritage Plaza sa Barangay  Centro  sa Siyudad sa Mandaue nga nagsugod alas 10  sa gabii sa Disyembre 31, 2023. Si Mayor Jonas Cortes ug ubang opisyales sa kagamhanan sa dakbayan maoy nangulo sa maong panagtapok nga gisugdan pinaagi sa Santos nga Misa diha sa National Shrine of Saint Joseph hangtod nga gisugdan ang new year  count down.

Gidungan sab niini ang opisyal nga pagpasiga sa Presidencia Clock Tower dungan sa pagpatak sa unang gutlo sa  tuig 2024.

“Ang Presidencia Clock Tower sa Mandaue City Hall nagtimaan sa padayon nga pag-abante sa Mandaue City. Sama sa orasan walay hunong ang atong administrasyon sa pagpangita og mga pamaagi aron paghatag og serbisyong kalambuan sa katawhan,”  nagkanayon si Cortes  sa iyang mensahe nga gi-post sa social media .

Sa pikas bahin, malinawon  ang kinatibuk-an nga pagsugat  sa tugang gabii  sa Bag-ong Tuig 2024  sa Siyudad  sa Mandaue ug Siyudad sa Lapu-Lapu apil na ang mga kasikbit nga mga lungsod sa Cordova ug Consolacion.

Ang buhtan sa kapolisan sa maong mga lugar walay natala nga mga panghitabo nga naglambigit sa pagsugat sa Bag-ong Tuig sama sa mga krimen.

Sa mga  misa sa nagkadaiyang simbahang Katoliko nga gitapokan sa daghang mga nanimba  sayo  sa gabii  sa pagsugat sa Bag-ong Tuig ang higpit  nga gibantayan sa kapolisan pinaagi  sa polis  ug ang pipila niini kanila  ang nagpatrolya ug nagpahigayon og checkpoints.

Sa sayo  sa gabii sa pagsugat sa Bag-ong Tuig si Police Colonel Elmer  Lim, director sa Lapu-Lapu  City Police Office (LCPO) kuyog  sa uban pa nga mga opisyal ang pagpahigayon og inspeksyon  sa kahimtang sa mga simbahan.

Si  Police  Lieutenant  Colonel  Christian Torres, tigpamaba  sa LCPO miingon nga ang ilang higpit  nga pagbantay sa tibuok dapit  sa dakbayan magpadayon na kini hangtod sa  kapistahan sa Siyudad sa Sugbo sanglit ilang gilauman ang pagpangabot usab sa mga langyaw. IBM (BANATNEWS)