Pangbayad sa SSS sa drayber nasakiyo sa seksing pasahero

CEBU, Philippines — Usa ka taxi driver ang nidangop sa kapolisan ug mireklamong gikawatan kini  sa iyahang batan-on ug sexy kaayo nga pasahero sa miaging gabii.

Ang taxi driver nag-edad og 58-anyos, taga Barangay Pasabungan, Dakbayan sa Mandaue.

Sigon sa biktima nisakay matod pa ang babaye sa may Happy Valley duol sa Court of Appeals, nagpahatud kini sa Napolcom sa may N. Bacalso Avenue.

Samtang nagdagan ang taxi giingong giestoryahan siya sa babaye ug nanghagad matod pa nga moadto og bar aron maglipay-lipay apan nibalibad ang biktima.

Pag-abot sa destinasyon nibayad ang maong sexy nga babaye sa patak sa taxi nga P90 ug dayong gawas.

Apan sa dihang nakadagan na siya’g pila ka metros nakita niya ang iyang pitaka nga anaa na sa salog sa taxi sa atubangan human nahayagan sa suga sa poste.

Paghiling pa niya sa pitaka wala na kini sulod ug nawagtang na ang iyang kwarta nga moabot sa P7,000 nga pang kontribusyon niya sa iyang SSS.

Midali siyag atras sa sakyanan apan wala na niya maabti pa ang sexy nga babaye. Iya ning gipahibawo sa iyang mga kaubang taxi driver ug gihilagway niini ang maong babaye ug dinhi iyang nahibaw-an nga dili lang diay siya ang nabiktima niini.

Si Police Major Eraño Regidor ang hepe sa Labangon Police Station mipasalig nga ilang pangitaon ang maong babaye.

Samtang usa ka nagbangutang pamilya ang wala palabya sa kawatan nga nisulod sa haya sa ilang nitaliwang kabanay sa  usa ka punerarya diha sa dalan Natalio Bacalso Avenue sa Siyudad sa Sugbo  niadtong Huwebes sa gabii.

Nagtoo ang pamilya nga sensiro ang lalakeng nagpailang James, 29,  taga Barangay Guadalupe sa pagduyog sa ilang kasub-anan kay naki ‘uncle’ pa kini sa usa sa ilang kabanay ug namainit pa.

Apan dihang nakabinta gikuha niini ang cellphone sa apo sa gihaya.  Apan malas lang kay nabantayan kini ug nakuptan. Ang suspek gidala sa Police Station 6 sa Cebu City Police Office.

Sa laing bahin, padayon ang paghipos sa Danao City Police Station og mga ebidensiya apil na mga kopya sa mga CCTV footages sa palibot sa usa ka dakong mall sa barangay Poblacion nga gilungkab sa mga wala mailhing kawatan.

Ang mga kawatan nakasakiyo og P4.5 milyones nga balor sa mga alahas ug kwarta sa usa sa mga tenants nga pawnshop, samtang P170 mil ug mga cellphones ang nawagtang sa usa ka cell shop. Diha niagi sa gibuslutang bungbong sa likod nga bahin sa maong mall ang mga kawatan. Nagkanayon si Police Major Wendel Abellana, tigpamaba sa sa Cebu Police Province Office nagtigom na sila og mga kopya CCTV nga makatabang sa pagsulbad sa krimen. –John Mark Dejito PIT-Intern/IBM BANAT NEWS