Manag-uyab gipapriso sa amigo
CEBU, Philippines — Natingkagol sa prisohan sa Mabolo Police Station 4 ang lalaki ug ang uyab niini human sila gipasanginlang mikawat sa cellphone sa ila ra sab nga amigo diha sa Generoso St., Barangay Apas, Cebu City, mga ala 1 sa kaadlawon, Hunyo 19, 2024.
Ang mga suspek giila nga si Adolfo Ragas alyas “Adolfo”, 28, ug si Mariel Ann Tañega, 24, parehong estambay ug mga residente sa naasoy nga lugar.
Ang biktima mao si Edan Arevalo, 25, kinsa natulog nianang tungora sa iyang gipuy-ang apartment nga si Ragas ug gikatahong gikuha ang iyang selpon. Ang giingong uyab sa suspek maoy nagsilbing lookout sa gawas.
“Silang duha nagkuyog ni sila. Pagsud ngadto naana ni didto ang iyahang uyab kuyog. Ang uyab murag dira sa gawas unya pagkuha sa suspect so silang duha maoy nagdungan og panglakaw. So murag nag-connive ni sila para kawaton ang selpon”, matud pa ni Police Major Romeo Durano Caacoy Jr.
Gidemalas ang mga suspek kay nakamatikod ang biktima ug daling nigukod ug mao kini ang nabantayan ni Police Corporal Israel Piape ug mga Barangay Tanod nga nagpatrolya sa dapit anang tungura.
Dali silang niresponde hangtud nadakpan og una si Tañega ug sunod si Ragas diha sa 9th St. sa maong barangay ug nabawi gikan sa duha ang cellphone.
Sa pikas bahin, gitanggong sa Abellana Police Station 2 ang usa ka batan-ong lalaki nga misuway og katkat sa paril University of San Carlos-North Campus diha sa Gen. Maxilom Avenue buntag adlaw nga Miyerkukes.
Matud pa nasakpan kini sa gwardiya nga nikatkat sa ilang paril hinungdan nga kini gidakop. Sa pagsiksik kaniya giingong nakuhaan kini og 10.5 pulgadas nga kutsilyo gikan sa iyang hawak. —John Geron Encabo John Mark Dejito (BANAT NEWS)
- Latest
