5 km nga karsada sa CSCR sa Talisay napasigaan na
CEBU, Philippines — Napasigaan na ang kinatibuk-ang lima ka kilometro nga karsada sa Cebu South Coastal Road (CSCR) human sa pila ka tuig nga pagpinaabot nga masug-an ang maong lugar nga diin dunay mga disgrasyang nahitabo sa nanglabay nga mga buwan.
Ang proyekto nilanat og mga buwan tungod sa pundo nga gipaabot alang mapahigayon kini sa Department of Public Works and Highways (DPWH).
Si Mayor Gerald Anthony “Samsam” Gullas nipahibawo nga ang suga sa CSCR maoy usa sa mga naguba sa dihang miigo ang bagyong Odette. Gipasabot ni Gullas nga wala dayon kini magahinan ug pundo sa tuig 2022 tungod kay humana man ang pag-aprobar sa budget sa dihang miigo ang Odette.
Hinuon iyang gipasiguro sa iyang kapikas nga si Kongresista Rhea Gullas nga magahinan gyud kini og pundo hangtud nga kini natuman. Ang CSCR karon hayag na ug di na mabalaka ang motorista sa ilang pagmaneho. Sa dihang menos pa ang suga nga nagsiga sa lugar daghan ang nahitabo nga disgrasya sa maong karsada. (BANAT NEWS)
- Latest
