Mental health ordinance ipatuman sa Mandaue

CEBU, Philippines — Gitinguha karon  sa kagamhanan  sa Siyudad  sa Mandaue  nga ang  mga magtutudlo nga ubos sa Department of Education (DepEd)  ang mapaubos sa mga pagbansay-bansay  kalabot sa mental health.

Ang maong mga pagbansay-bansay nga himuon sa mga magtutudlo sa siyudad   kabahin kini sa pagpatuman sa mental health ordinance sa lokal nga kagamhanan.

Si Atty.  Ebenezer Daryl Manzano, pangulo sa Mandaue City Substance  Abuse  Prevention Office (MCSAPO) nagkanayon nga si Mayor  Jonas  Cortes ang nagtinguha sa pagpatuman niini pinaagi sa mga lakang nga pagahimuon sa mga sakop sa mental health board sa siyudad

Giklaro ni Manzano nga ang mga magtutudlo maoy ilang nakita nga mga lakang sa pagpakgang kalabot  sa mental problem nga naglambigit sa mga kabataan.

Matud usab ni Manzano nga dako kini og ikatabang tungod kay ang DepEd kulang man usab og mga guidance counselor o psychometrician sa ilang mga tunghaan.

Dugang  ni Manzano nga labing maayong mabansay usab ang mga magtutudlo kalabot sa mental health aron makahimo kini og mga lakang  sa paghatag og paasiunang pagtagad kon makamtikod kini kalabot  sa mental health issue  sa mga tinun-an. —/BDB (BANAT NEWS)