Pasigarbo sa Sugbu gisabotahe?

CEBU, Philippines — Nabutang karon sa pagduda ang kadaugan sa contingents sa host nga Siyudad sa Carcar sa bag-ohay natapos nga Pasigarbo sa Sugbo 2023 tungod sa sagunson nga mga aberyang teknikal nga mismo si Cebu Governor Gwendolyn Garcia nagtuong dunay “sabotaheng” nahitabo.

Ang Kabkaban Festival Queen sa maong siyudad anak sa tagiya sa Alberca Lights and Sounds Rental nga maoy gikuha para sa maong kompetisyon nga nakapadugang sa mga pagduda.

Si Garcia miingon nga ang angay unta niadto, mitug-an daan si Isidro Alberca (tagiya) nga ang anak niini usa sa mga makig-compete sa Festival Queen ilabi na nga sila maoy dunay kontrol sa sound system, video ug lightings sa maong event.

“Nag full disclosure ka unta nga imong anak kandidata as Carcar Festival Queen,” matud pa sa gobernador.

Apan si Alberca sa interbyu kaniya sa The Freeman, igsuong pamantalaan sa Banat News  nianang gabhiuna sa pagkahitabo kusganong mihimakak nga gisabotahe nila ang event.

“Bisan mamatay pa ko karon, wala ko nag sabotahe sa event ni Gov Gwen intawon. Naay Ginoo sa langit honest ko nga pagkatawo. Wala na sa akong hunahuna nga isabotahe ang Pasigarbo sa Sugbo,” matud pang Alberca,  kinsa 13 ka tuig na sa maong negosyo, matud niya pa pa kini ang unang higayon nga nakontrobersiya iyang negosyo.

Matud pa niya, nidaog iyang anak base sa desisyon sa hurado ug dili tungod kay iyaha kining anak.

“Naa may mga judges nga ni judge sa mga festival queen. Sa kadtong pag pre-judging sa mga mga festival queen, ang akong anak nag trending na daan,” matud pang Alberca.

Matud niya, siya maoy gikuha para sa LED wall, sound system ug lightings.

“Mao ra na akong role intawon. Wala koy labot anang unsay ipangpaslak nga video nganha kay dili na mao akong trabaho. Ang Province naay production team nga maoy in charge sa flow sa production. Ngano ako na man hinoon ang gibasol sa tanan?,”  matud ni Alberca.

Sumala pa niya, duna siyay sakop nga ginganlan og Jabert, nga maoy giduol sa mga production team aron maoy modawat sa mga videos sa nagkadaiyang LGUs.

“Si Jabert gibayran na sa production team para maoy mopaslak anang nga videos paro kana internal na nila nga sabot. Kay gibayran gud siya separately para sa kana nga trabahua. So, ako wala koy labot ana,” esplikar pang Alberca.

Matud niya nangayo siya og pasaylo sa gobernador atol sa event apan wala na siya paminawa niini. Matud niya andam siyang makigatubang sa gobernador aron tug-anan kini unsay tinuod ug gusto niyang naa sab niana ang production team sa kapitolyo.

Ang gobernador miingong miabot og 15 ka technical glitches ang nasinati atol sa event. Kining tanan nahitabo sa 15 ka contingents gikan sa ubang LGUs, apan sa dihang ang Carcar City Kabkaban Festival contingents na, hanoy ug walay nahitabong aberya lakip sa pag-perform sa Festival Queen nga si Jhesidy Thea.

Naapil sa naputol sa pag-perform ang mga ‘heavyweight contingents’ sama sa Toledo City nga nag-repeat performance kay kalit napawong ilang tukar, samtang ang Mandaue City, katulo sab nibalik tungod gihapon sa nahitabo.

Matud sa gobernador, dili kadto sayop sa contingents, gibasol niya ang Alberca Lights and Sounds Rental.

Sa press conference sa gobernador kagahapon, siya mipasidaan sa mga mayor nga posibleng dunay mausab sa resulta sa kompetisyon tungod kay usbon nila ang pagkwenta sa iskor. Sa pagkakaron, 85 porsiyento gikan sa hurado samtang 15 gikan sa online voting.

“You are asking me, I am changing the rules in the middle of the game. Well, I also did not expect there will be a sabotage in last night’s production. I am calling it a sabotage because by the very fact alone that Mr. Alberca did not care to divulge that his own daughter was also a candidate for Pasigarbo Festival Queen, para nako that was unethical and could led to suspicions not necessarily from me, by other people nga gisabotahe,” sumala pa sa gobernador.

Inay nga mag-awarding kagahapong adlawa Agosto 28,2023 diha gihapon sa Carcar City Sports Complex, wala na kini mahinayon kay paabuton nalang ang resulta sa giusab nga pagkwenta sa iskor. Si Atty. Donato Villa, Cebu Provincial Legal Officer miingon nga posibleng magatubang og kaso si Alberca tungod sa pagpabaya ug kalapasan kini sa obligasyon niya sa kontrata ngadto sa probinsya.

Ang maong kompanya dugay ng maoy kuhaon sa kapitolyo sa mga kalihokan niini sa kalungsoran. Ug matud pa sa nakalabay’g tuig gipasidan-an na sila nga ilisan ilang gigamit nga laptop apan wala nila kini buhata matud pa sa gobernador.

Tungod sa nahitabo sa Mandaue City nga katulo nibalik og perform gipabutangan sa gobernador og mga polis ang booth sa Alberca ug gipasidan-an nga wala silay tandugon.

“Kabantay mo after the Mandaue City performance up to the last contingent, wala nay palpak,” matud sa gobernador.

Base sa resulta sa kompetisyon, ang Sugat Kabanhawan sa Minglanilla  maoy kinadaghanan og nadawat nga pasidungog, sila sab ang second place in the Grand Ritual Showdown, Best in Festival Costume, second place sa street dancing competition, Best in Mayor’s Introduction, ug second runner sa Festival Queen category.

Samtang gawas sa pagdaog sa Pasigarbo Festival Queen 2023, ang Carcar City contingents maoy nahimong kampeyon sa Ritual Showdown ug Champion sa street dancing.

Sa ritual showdown, 3rd place ang Hinulawan Festival sa Toledo City; 4th place- ang Sarok Festival sa Consolacion; 5th place ang Dagitab Festival sa City of Naga; 6th place ang Palawod Festival sa Bantayan; 7th place ang Kagasangan Festival sa Moalboal; 8th place ang Panagbagat Festival sa Poro; 9th place ang La Torta Festival sa Argao; ug 10th place ang Rosquillos Festival sa Liloan.

Sa street dancing: 3rd place ang Humba Festival sa Ronda; 4th place ang Utanon Festival sa Dalaguete; 5th place ang Halad Inasal Festival sa Talisay City

Samtang Best in Festival Jingle ang Rosquillos Festival; Best in Decorated Van ang Sarok Festival.

Sa Pasigarbo Sa Sugbo Festival Queen, 2nd place ang Hinulawan Festival; 3rd place ang Sugat Kabanhawan; 4th place ang Panagtagbo Festival ug 5th place ang Kagasangan Festival.

Ang Miss Photogenic nakuha sa Soli-Soli Festival sa San Francisco; Best in Group Production ang Hinulawan Festival; Best Solo Performer:  ang Dinagat Festival sa Cordova; ug Best Festival Queen Costume ang Kagasangan Festival.

Gawas sa maong mga aberya, way natala ang kapolisan nga panghitabo nga nakabalda sa mang event sumala pang Police Lt. Col. Gerard Ace Pelare, tigpamaba sa PRO-7. Dul-an sa dos mil ka mga polis ug uban pang law enforcement ug security units sa probinsya ang nagtinabangay sa pagbantay dili lang sa mga contingents apan lakip na na sa mga manan-away ug sa mga VIP nga mga bisita sama nilang Vice Presidente Sara Duterte-Carpio ug First Lady Lisa Araneta-Marcos ug mga opisyales sa gobiyerno. — Decemay Padilla