Hinigugma sa gipatay sa  Moalboal nangayo og hustisya

CEBU, Philippines —  Hustisya maoy padayon nga singgit sa hinigugma sa lalaki nga gipatay sa lungsod sa Moalboal usa ka adlaw sa dili pa ang fiesta niadtong May 15, 2023.

Matud pa ni Loraine Cabusog, MSWDO Office Staff sa lungsod, duha ka buwan kapin na ang nakalabay human gipatay ang iyang hinigugma apan pabilin gihapon ang iyang gibati nga kasakit tungod kay matag adlaw makita ug maagian niya ang crimescene apan hangtud karon padayon pa gihapon gawasnon ang maong suspetsado.

Pangindahay niini nga mahatagan ug hustisya ug mataral gayud sa hukmanan ang suspetsado nga nihimo sa krimen sa iyang uyab.

Malaumon si Cabusog nga madakpan ang suspetsado tungod kay dako kaayo kining insulto sa pangagamhanan tungod kay diha man nahitabo duol sa balay lungsod ang krimen. Dugang pa ni Cabusog, duha ka adlaw human sa 40 days sa iyang uyab gisuwayan pa ug sunog ang lubnganan niini ug dako iyang pagtuo nga gihasul siguro sa tanlag ang suspetsado.

Apan si Police Captain Etelberto Timagos ang Hepe sa Moalboal Police Station nibutyag, nga misang-at na sila og kaso batok sa gitumbok nga suspetsado base sa saksi nga ilang gihuptan.

Sumala pa ni Timagos, paabot nalang sila sa warrant of arrest nga luwatan sa korte aron ilaha na kini maimplementar.

Love triangle ang usa sa ilang gitutukan nga motibo sa pagpatay sa biktima.

Gipasalig ni Timagos, nga ang kapolisan padayong naglihok ug nga anaa kanunay ang presensya sa kapolisan aron mapugngan na ang mga mohimo og krimen sa ilang lugar. (BANAT NEWS)