P10.5 milyones nga balor sa drugas nasakmit sa 2 ka adlaw nga SACLEO
CEBU, Philippines — Nakadakop og 573 ka indibidwal ang Police Regional Office-7 sa ilang Simultaneous Anti-Criminality law enforcement Operations SACLEO sa Hulyo 11 ug 12, 2023 sa tibuok Central Visayas.
Kini miresulta sa pagkasakmit sa 1,545.18 grams sa illegal nga drugas nga nagkantidad og P10.5 million ug pagdakop sa 150 ka drug personalities.
Nakompiskar sab nila ang P23,547 nga bet money sa anti-illegal gambling operations ug 210 ka indibidwal ang nasikop. Sa loose firearms operations na recover sa kapolisan ang 177 ka unlicensed firearms, duha ka explosives ug 15 ka tawo ang nadakpan.
Samtang 19 ka most wanted persons ug 179 ka other wanted persons ang nadakpan sa pagpatuman nila sa mga pending warrant of arrest.
Ang tanang ebidensiya nga nasakmit gikan sa operasyon gisumetir na sa Forensic Unit alang sa examination ug ang mga arestado naa sa mga custodial facility alang sa pagpasaka og kaso.
Samtang nasikop sa City Intelligence Unit sa Cebu City Police Office ang usa ka Priority Top Ten Regional Level atol sa ilang buy-bust operation niadtong Huwebes sa gabii sa Sitio Nangka, Barangay Kamputhaw, siyudad sa Sugbo. Giila ang dinakpan nga Jade Ostulano Aragon alyas A-JED, 33 anyos, molopyo sa Barangay Pasil, siyudad sa Sugbo ug apil sa listahan sa High Value Individuals.
Si Aragon nakuhaan og 102 gramos sa shabu nga nagkantidad og P693,600. Suma sa kapolisan si Aragon makadispose og 100 ngadto sa 300 grams sa illegal drugas kada semana.
Sa laing operasyon nasakmit sa mga sakop sa City Drug Enforcement Unit (CDEU) sa Lapu-Lapu City Police Office (LCPO) ang 1,058.5 gramo nga shabu nga mibalor og P7,197,800.00 gikan sa High Value Individual (HVI) nga nasikop atol sa buy bust operation sa Barangay Mactan.
Si Police Major Airbert Jay Samson, hepe sa CDEU sa LCPO miila sa dinakpan nga si Romel Abatas alyas Ronron, 35 anyos, taga Barangay Manipis sa siyudad sa Talisay. — Romeo D. Marantal, Romeo T. Limpangog (BANAT NEWS)
- Latest
